პოლიციამ ინტერნეტით ნარკოტიკების უკანონო გასაღების ბრალდებით ხუთი პირი დააკავა. მათ 8-დან 20 წლამდე ან უვადო პატიმრობა ემუქრებათ.

როგორც შსს ამბობს, ორმა დაკავებულმა მესენჯერ ტელეგრამში ე.წ. დრაგ-შოპების ჯგუფები, ხოლო მატანგაზე ნარკოტიკების სარეალიზაციო ონლაინმაღაზია შექმნეს. მათივე თქმით, სხვა დაკავებული აღნიშნული ჯგუფების ოპერატორი იყო და წინასწარ შერჩეულ ადგილებზე ნარკოტიკები მიჰქონდა.

უწყების ცნობით, დაკავებულების პირადი ჩხრეკისას, დაახლოებით, 100 გრამი ჰაშიში ამოიღეს. ერთ-ერთი ბრალდებულის საცხოვრებელი ბინის ჩხრეკისას კი ამოღებულია ე.წ. ბიო და ნარკოტიკული საშუალება ალფა პვპ, რომლებიც ე.წ. დრაგ-შოპების მომხმარებლებზე უნდა გაესაღებინათ.

როგორც განცხადებაში ვკითხულობთ, დაკავებულთაგან ორს ნარკოტიკების დაფასოება და სხვადასხვა ადგილზე სარეალიზაციოდ განთავსება ევალებოდათ.

გამოძიება ორგანიზებული ჯგუფის მიერ ნარკოტიკული საშუალებების უკანონო შეძენა-შენახვისა და გასაღების ფაქტზე, საქართველოს სისხლის სამართლის კოდექსის 260-ე მუხლის მე-6 ნაწილის "ბ" პუნქტით და მე-5 ნაწილით მიმდინარეობს.

გარდა ამისა, ნარკორეალიზების სხვა საქმეზე შსს-მ სამი პირი ფონიჭალაში დააკავა. მათივე თქმით, დაკავებულებისაგან ნარკოტიკული საშუალება ჰეროინის საკონტროლო შესყიდვა და აღნიშნული შესყიდვების ფარული ვიდეო და აუდიოჩაწერა განახორციელეს. სამივე ბრალდებულს 8-დან 20 წლამდე ან უვადოდ თავისუფლების აღკვეთა ემუქრება.

კიდევ ერთი პირია დაკავებული ნარკოდანაშაულის ბრალდებით თბილისში. უწყების თქმით, დაკავებულის პირადი და საცხოვრებელი ბინის ჩხრეკისას, 500 აბი ნარკოტიკული საშუალება ექსტაზი და 4 შეკვრა მდმა ამოიღო. გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტებზე, საქართველოს სისხლის სამართლის კოდექსის 260-ე მუხლის მე-6 ნაწილის "ა" ქვეპუნქტით მიმდინარეობს.