22 იანვარს გარდაცვლილი 4 წლის ბავშვის დედის ინტერესების ადვოკატი ამბობს, რომ მისი დაცვის ქვეშ მყოფს შემაკავებელი ორდერით გათვალისწინებული ვალდებულება არ დაურღვევია. ამის შესახებ მან დღეს, 24 იანვარს აღკვეთის ღონისძიებაზე მსჯელობის დასრულების შემდეგ განაცხადა, სადაც ქალი პატიმრობაში დატოვეს.

ადვოკატის თქმით, შემაკავებელი ორდერი 6 იანვარს გამოიცა, თუმცა მას შემდეგ ბავშვი ოჯახიდან არც სოციალურ სამსახურს წაუყვანია და არც პოლიციას.

"ორდერში ცალსახად წერია, რომ ბრალდებული არ უნდა მიახლოებოდა დაზარალებულის საცხოვრებელს, არ უნდა ეცადა მასთან კომუნიკაცია. დაზარალებული განრიდებული უნდა ყოფილიყო მოძალადისგან, რაც არ განხორციელებულა. განრიდება თუ მოხდებოდა და მას მერე მიუახლოვდებოდა, ამ შემთხვევაში დაირღვეოდა", — ამბობს ადვოკატი.

On.ge-ს შინაგან საქმეთა სამინისტროში განუცხადეს, რომ 6 იანვარს ბავშვი გადაიყვანეს საავადმყოფოში და ინციდენტის შესახებ აცნობეს სოციალური მომსახურების სააგენტოს. სააგენტოში ამ საკითხზე არ საუბრობენ მოკვლევის დასრულებამდე, ზოგად წესთან დაკავშირებით კი აცხადებენ:

"როდესაც შემაკავებელი ორდერი გამოიცემა, საპატრულო პოლიცია და სოციალური მუშაკი ერთად მოქმედებენ. არასამუშაო საათებში პოლიცია მოქმედებს სოციალურ სამსახურთან შეთანხმებით. იმისდა მიხედვით, რა მდგომარეობაა, ან გადაჰყავთ მესამე პირთან ან საავადმყოფოში ან ბავშვი გადადის სახელმწიფო ზრუნვაში".

22 იანვარს თბილისში, სანზონაში არსებულ ერთ-ერთ საცხოვრებელ სახლში ოთხი წლის გოგო გარდაცვლილი იპოვეს. გარდაცვალების ფაქტზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.

შინაგან საქმეთა სამინისტროში გენერალური ინსპექციის მიერ პარალელურად დაწყებულია შესწავლა და სამსახურეობრივი შემოწმება, რომელიც დაადგენს მიმდინარეობდა თუ არა ეფექტიანად შემაკავებელი ორდერის მონიტორინგი. მცირეწლოვანის გარდაცვალების ზუსტი მიზეზის დადგენის მიზნით, ტარდება საგამოძიებო ღონისძიებები, დანიშნულია სასამართლო-სამედიცინო ექსპერტიზა.

შინაგან საქმეთა სამინისტროს განცხადებით, დაკავებულია გარდაცვლილი 4 წლის გოგოს დედა სისხლის სამართლის კოდექსის 381¹-ე მუხლით, რაც შემაკავებელი ორდერით გათვალისწინებული მოთხოვნების შეუსრულებლობას გულისხმობს. ამ ორდერით დედას ეკრძალებოდა არასრულწლოვანთან კონტაქტი.