ეკა ბესელიამ ქართული ოცნების უმრავლესობის სხდომის დატოვების შემდეგ ჟურნალისტებთან ბიძინა ივანიშვილზე შეცვლილი რიტორიკით ისაუბრა. მან თქვა, რომ "როგორც ლიდერმა" ამ რთული პროცესის მედიაცია კარგად მოახერხა. ბესელიამ აღნიშნა ისიც, რომ შეხვედრა იყო კონსტრუქციული და პარტიის თავმჯდომარეს სწორი პოზიცია ჰქონდა პროცესის მიმდინარეობასთან დაკავშირებით:

"ჩემთვის ეს არის ძალიან მნიშვნელოვანი, ის, რომ უნდა მოვუსმინოთ ერთმანეთს, რაღაცები შეიძლება განსხვავებულად დავინახოთ. [ბიძინა ივანიშვილმა] თქვა, რომ გავაგრძელოთ იქამდე, ვიდრე საერთოდ არ შევთანხმდებით. დავინახე კონსენსუსის შანსი".

ბესელიას მსგავსად ბიძინა ივანიშვილი პოზიტიურად დაახასიათა გია ვოლსკიმ, რომელმაც თქვა, რომ "ივანიშვილი იყო პრაგმატული მედიატორი და წამყვანი".

10 იანვარს გავრცელებული განცხადებით, ბიძინა ივანიშვილმა ეკა ბესელიას გუნდურობა დაუწუნა. ივანიშვილის თქმით, ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიისა და გუნდურობის პრინციპების წინააღმდეგ წავიდა. ქართული ოცნების ლიდერმა აღნიშნა ისიც, რომ ბესელიამ ვიცე-სპიკერად დანიშვნის შეთავაზება არასწორად დაუკავშირა უზენაესი სასამართლოს მოსამართლეების არჩევის პროცესს. ივანიშვილის განცხადება არ გაიზიარა ეკა ბესელიამ და თქვა, რომ ეს არ იყო სიმართლე. მისი თქმით, რა არის შიგნით სალაპარაკო და რა საჯაროდ განსახილველი არავისგან ესწავლება.