ამერიკის კინოაკადემია ყოველწლიურად საპატიო ოსკარს აძლევს იმ ხელოვანებს, რომელთაც ფილმის ინდუსტრიაში განსაკუთრებული როლი ითამაშეს.

საპატიო ჯილდოებს სპეციალურად შერჩეული დამოუკიდებელი საბჭო გასცემს და მასში აკადემიის 6000 წევრიდან არც ერთი არ შედის. ცერემონიალზე წარმოდგენილია 3 საპატიო ოსკარი - აკადემიის საპატიო ჯილდო, ჯიმ ჰერშლოტის ჰუმანიტარული ჯილდო და ირვინგ თალბერგის მემორიალური ჯილდო.

საპატიო ოქროს ქანდაკებას წელს 62 წლის მსახიობს, რეჟისორს, პროდიუსერსა და სცენარისტს ჯეკი ჩანს მიანიჭებენ, რომელიც ჩვენთვის თავისი აკრობატული ჩხუბის სტილითა და კომედიის დიდი ნიჭითაა ცნობილი.

საპატიო ოსკარის გადაცემის ცერემონიალი როგორც წესი მთავარ ცერემონიალამდე რამდენიმე თვით ადრე ხდება, წელს ეს თარიღი 12 ნოემბერია.

საპატიო ოსკარს მრავალწლიანი ისტორია აქვს, მაგალითად 1972 წელს კინოაკადემიამ პრიზი ამერიკაში დაბრუნებულ ჩარლი ჩაპლინს გადასცა, რომლისთვისაც ოსკარი ერთგვარად ბოდიშის მოხდის სიმბოლო გახდა, რადგან თავის დროზე მუნჯი კინოს ლეგენდას ამერიკელები ჯაშუშობაში ადანაშაულებდნენ.

ამავე ჯილდოს ერთ-ერთი მფლობელია ლეგენდარული მსახიობი ლოურენ ბეკოლიც, რომელსაც 2009 წელს კარიერის 55 წლის იუბილეზე საჩუქარი გაუკეთეს და საპატიო ოსკარი გადასცეს.


ანჯელინა ჯოლის, რომელიც ამერიკელ მშვიდობის ელჩად ითვლება, 2013 წელს ჯიმ ჰერშლოტის ჰუმანიტარული ჯილდო გადაეცა.


გამონაკლისი არც შარშანდელი წელი იყო, გასული წლის 14 ნოემბერს ამერიკის კინოაკადემიამ კინოში შეტანილი განსაკუთრებული წვლილისთვის ლეგენდარული მსახიობის ჯენა როულენდსის ღვაწლი საპატიო ოსკარით აღნიშნა.

წელს, ჯეკი ჩანთან ერთად საპატიო ოსკარს გადასცემენ რედაქტორ ენ კოტს, კასტინგის დირექტორს ლინ სტელმასტერსა და დოკუმენტალისტ ფრედერიკ ვაისმენს.