საქართველოს მართლმადიდებელი ეკლესიის კათალიკოს პატრიარქი ილია მეორე მიიჩნევს, რომ მნიშვნელოვანია, ადამიანებმა შეიძინონ ანალიტიკური აზროვნების უნარი. ამის შესახებ მან ვარსკვლავური ჟურნალის, OK-ს ქართულ გამოცემას განუცხადა.

"უნდა ვეცადოთ შევიძინოთ ანალიტიკური ღრმა აზროვნება. თუ არ გვექნება ანალიტიკური აზროვნება, მრავალ შეცდომას დავუშვებთ. მოსმენის უნარიც უნდა გვქონდეს. ერთმანეთს უნდა მოვუსმინოთ და ნაკლები ვილაპარაკოთ. ანალიტიკური აზროვნება იცავს პიროვნებას არასწორი ქმედებებისგან".

ინტერვიუს მიმდინარეობისას ჟურნალისტმა ოლგა ბაბლუანმა ილია მეორეს უთხრა, რომ "ისტორიული მემკვიდრეობიდან გამომდინარე, რთულია ადამიანებს ჰქონდეთ ასეთი აზროვნება". აღნიშნულთან დაკავშირებით პატრიარქმა მას ასე უპასუხა:

"გააჩნია ვინ იყვნენ მშობლები. დიდი მნიშვნელობა აქვს გარემოს, სკოლას, ზოგადად აღზრდას. ანალიტიკური აზროვნება ერთ და ორ დღეში არ მოიპოვება, ამასთან ცხოვრებისეული გამოცდილებაც მნიშვნელოვანია".

ოლგა ბაბლუანმა ილია მეორეს ასევე ჰკითხა, როგორ მოახდინა პატრიარქის პოზიციიდან კომუნისტურ ეპოქაში ახალგაზრდებზე გავლენის მოხდენა და ეკლესიის გარშემო შემოკრება, რაზეც პატრიარქმა უპასუხა:

"მხოლოდ სიყვარულით, პატივისცემით, საუბრებით. ჩვენი ახალგაზრდა თაობა იყო და არის ჭკვიანი და წრფელი. სჯეროდათ და, ვფიქრობ, სჯერათ ჩემი. მე ნამდვილად გულწრფელად ვესაუბრები მათ".

ჟურნალი OK შოუ-ბიზნესის შესახებ წერს და ის მსოფლიოს 20-მდე ქვეყანაში გამოიცემა. ილია მეორესთან ინტერვიუ ჟურნალის სექტემბრის ნომრის მთავარი თემაა. ჟურნალში ასევე არის ნაწყვეტები მისი ეპისტოლეებიდან, ფოტოები და ბიოგრაფია.