ბავშვთა ფსიქოლოგი, მაია ცირამუა მიიჩნევს, რომ თბილისის მერმა, კახა კალაძემ და საქართველოს პრემიერ-მინისტრმა, მამუკა ბახტაძემ საზოგადოებაში ბულინგი წაახალისეს. ასე შეაფასა ფსიქოლოგმა მერის განცხადება, რომელიც ოპონენტებს "მთაწმინდიდან გამოქანებისკენ" მოუწოდებდა და პრემიერის რეპლიკა, რომელიც ამბობდა, რომ კალაძეს არაერთიკური არაფერი უთქვამს.

მისი თქმით, ძნელია საზოგადოებაში ძალადობის პრობლემის მოგვარება, როცა პოპულარული პოლიტიკური ფიგურები ოპონენტებთან საუბრისას კომუნიკაციის ამ ხერხს მიმართავენ.

"თუ ქალაქის მერს შეუძლია, ასეთი დამოკიდებულბა გამოხატოს თავისი პოლიტიკური ოპონონეტების მიმართ, რას ვერჩით ბავშვებს, რომლებიც იგივეს აკეთებენ სკოლაში? რა სინდისით უნდა მოვთხოვოთ მათ ჩვენ პასუხი?" — ამბობს ცირამუა On.ge-სთან საუბრისას.

ფსიქოლოგის შეფასებით, პრემიერი მოიქცა სკოლის იმ მასწავლებელივით, რომელიც ბულინგის დროს სწორი კომუნიკაციის ნაცვლად ამბობს ხოლმე: "ეს იყო ხუმრობა".

"[მსგავსი დამოკიდებულება] ფაქტობრივად, პირდაპირ აისახება მოზარდებზე, ბავშვებზე... ამიტომ ის ადამიანი, რომელსაც ასეთი მაღალი ნდობა აქვს, პოპულარულია, იქნება ეს პოლიტიკური ფიგურა, ხელოვნების სფეროს წამორმადგენელი თუ ნებისმიერი ადამიანი, რომელსაც გარკვეული როლური მოდელის ფუნქცია გააჩნია, ძალიან მაღალი პასუხისმგებლობა აქვს და ყოველი მისი სიტყვა უნდა იყოს მოზომილი და აწონილი", — აღნიშნა ფსიქოლოგმა.

გუშინ, 18 იანვარს თბილისის მერმა ოპონენტების ბრალდებებზე საუბრისას თქვა, რომ მათ შეუძლიათ "მთაწმინდიდან გამოექანონ". მერის სიტყვების შეფასების შესახებ დასმულ კითხვას საქართველოს პრემიერმა პოლიტიკური უწოდა და რიტორიკულად იკითხა: "კახას სიტყვებია არაეთიკური? ამის თქმა გსურთ?"