ევროკავშირმა 2018 წლის დეკემბერში საქართველოს 110 მილიონი ლარი (36,8 მილიონი ევრო) გადმოურიცხა. ევროკავშირის ელჩის კარლ ჰარცელის თქმით, თანხა დასტურია იმ რეფორმების, რომელიც სხვადასხვა სფეროში განხორციელდა: სოფლის მეურნეობა და სოფლის განვითარება, მართლმსაჯულება, საჯარო სამსახურის რეფორმა, საკანონმდებლო ჰარმონიზაცია და ბიზნესის მხარდაჭერა, განათლება და შრომის ბაზარი.

"ევროკავშირის თანამშრომლობა მთავრობასთან სექტორული რეფორმების განხორციელების კონტრაქტების ფარგლებში საშუალებას აძლევს მთავრობას მიაღწიოს იმ შედეგებს, რაც ჩვენი დაფინანსების გარეშე შეუძლებელი იქნებოდა", — განაცხადა ევროკავშირის ელჩმა საქართველოში.

კარლ ჰარცელმა ჟურნალისტებთან რეფორმების წარმატებაზეც ისაუბრა. მისი თქმით, გაუმჯობესდა იურიდიული დახმარების ხელმისაწვდომობა, სურსათისა და შრომის უსაფრთხოებასთან დაკავშირებული ევროკავშირის სტანდარტების შესაბამისობა და ბიზნესის განვითარებისთვის გაზრდილი მხარდაჭერა.

"ეს მხარდაჭერა საქართველოს მოქალაქეთა ცხოვრებისთვის ხელშესახებ გაუმჯობესებას ქმნის და მე ველოდები, რომ თანამშრომლობა წლების განმავლობაში გაგრძელდება", — აღნიშნა ელჩმა.