მას შემდეგ რაც ზაფხულში რამდენიმე ბლოკ-ბასტერით და ე.წ. საზაფხულო კინოებით გავნებივრდით ან იმედი გაგვიცრუვდა, საშემოდგომო კინო აფიშას კიდევ უფრო მეტი იმედით უნდა ველოდოთ.

კინო-ეკრანები სექტემბრიდანვე დაიტვირთება უამრავი ახალი და საინტერესო კინოსურათით, რომელთა ჩამონათვალსაც შემოგთავაზებთ და თქვენც ამოარჩიეთ, რომელი უფრო ჯდება თქვენს გემოვნებაში.

1. THE BEATLES: EIGHT DAYS A WEEK - THE TOURING YEARS

რეჟისორი რონ ჰოვარდი ლეგენდარული ბითლზის შესახებ გადაღებულ დოკუმენტურ ფილმს გვთავაზობს. როგორც ტრეილერშია ნათქვამი, ამ ფილმში ისეთი საარქივო მასალა იქნება, რომელიც ჯერ არავის უნახავს. საეჭვოა, რომ ეს ფილმი ჩვენს კინო-თეატრებში ჩამოიტანონ, მაგრამ გულს ნუ გაიტეხთ, რამდენიმე თვე მოიცადეთ და მერე ტორენტებს მიაკითხეთ.

2. SNOWDEN

დარწმუნებული ვარ, ძალიან ცოტა ადამიანი არსებობს, ვისაც ედვარდ სნოუდენის შესახებ არ სმენია. ამ ადამიანმა კაცობრიობის ისტორიაში ყველაზე დიდ კონსპირაციას ახადა ფარდა და საკუთარი ქვეყნიდან გაქცევა მოუწია. ნახეთ ოლივერ სტოუნის ახალი ბიოპიკი, რომელშიც ჯოზეფ გორდონ-ლევიტი, ნიკ კეიჯი, თიმოთი ოლიფანტი და ზაქარი ქვინტო თამაშობენ.

3. Miss Peregrine's Home for Peculiar Children

რენსომ რიგზის ბესტ-სელერის ეკრანიზაცია, რომელიც უჩვეულო ბავშვების ცხოვრებაზე და მათ მათ თავგადასავლებზე მოგვითხრობს. წიგნი ქართულადაცაა ნათარგმნი და თუ წაკითხული არ გაქვთ, ფილმის გამოსვლამდე აუცილებლად ჩაუჯექით.

4. American Honey

კანის კინოფესტივალის ჟიურის პრიზის მფლობელი ფილმი, რომელშიც მოთხრობილია ამერიკელი ახალგაზრდების მოგზაურობის, საკუთარი თავის ძებნისა და თავგადასავლების შესახებ. ფილმს კრიტიკოსების მხრიდან კარგი გამოხმაურება მოჰყვა. ნამუშევარს ამ თაობის ერთ-ერთ მნიშვნელოვანი ფილმად მიიჩნევენ.

5. The Handmaiden

ერთ-ერთი ყველაზე წარმატებული კორეელი რეჟისორი პარკ ჩენ-ვუკი ახალ ფილმს წარმოგვიდგენს, რომლის სიუჟეტიც 1930-იანი წლების კორეაში ვითარდება. გრაფი ფუჯივარა ქურდ ქალს დაიქირავებს, რომელმაც მდიდარი ქალი ლედი ჰედიკო უნდა გაძარცვოს. სიტუაცია მკვეთრად იცვლება, როცა დაქირავებულ ქურდსა და მის მსხვერპლს ერთმანეთი უყვარდებათ.

6. Arrival

ახალ ფილმს ადამიანებისა და უცხოპლანეტელების კონტაქტზე ნოემბერში ვიხილავთ. ამ ფილმს ფანტასტიკის ჟანრის წლის მოვლენასაც უწოდებენ. მოლოდინები დიდია და იმედია გაამართლებს კიდეც.

7. Moana

ნოემბერში გამოვა დისნეის ახალი ფილმიც, რომელსაც პოლინეზიელი მთავარი გმირები ეყოლება, მოანა და მაორი. ანიმაცია, სავარაუდოდ და დიდი ალბათობით, დისნეის საუკეთესო ტრადიციებში იქნება შესრულებული, ბევრი სიმღერებით, კეთილისა და ბოროტის ბრძოლით და ამ უკანასკნელის დამარცხებით.

რა თქმა უნდა, შემოდგომაზე უამრავი ფილმი გამოდის და ყველა მათგანის ჩამოთვლას ვერ მოვახერხებდი. იმედია ყველა მათგანი გაამართლებს მოლოდინებს.