მცხეთაში ჯვრის მონასტერი წინამძღვრის გადაწყვეტილებით მეორე დღეა ჩაკეტილია. ეზოში არ უშვებენ არც ეკლესიაში ლოცვის მსურველებს და არც ტურისტებს. წინამძღვარი ასე აპროტესტებს ეკლესიის ეზოს გარეთ გარე ვაჭრობას.

კულტურის სამინისტროს ძეგლთა დაცვის სააგენტოში მიაჩნიათ, რომ ჯვრის მონასტერთან გარევაჭრობის აკრძალვით წინამძღვარს სურს ძეგლი ტურისტებისთვის უფრო მიმზიდველი იყო. უწყების პრესსამსახურმა On.ge-ს უთხრა, რომ ამ შემთხვევაში მათი პოზიცია და ეკლესიის აზრს ემთხვევა.

"მათი საჯარო განცხადებები, დღევანდელიც და აქამდე გაკეთებულიც, ფაქტობრივი მტკიცებულებების სახით ამაზე მეტყველებს. სხვა რამე მსჯელობის საფუძველი ნამდვილად არ გაგვაჩნია, რომ ამაში შევიტანოთ ეჭვი", — განაცხადა სააგენტოს პრესსამსახურის თანამშრომელმა, ბექა ბარამიძემ.

კულტურული მემკვიდრეობის დაცვის სააგენტოში ამბობენ, რომ მონასტერთან გარე ვაჭრობა ძეგლის ფიზიკურ და ვიზუალურ იერსახეს არღვევს, თუმცა აღნიშნავენ, რომ "ინფორმაცია არ აქვთ" რა იყიდება ეკლესიის ეზოს შიგნით. უწყებაში არ პასუხობენ კითხვას, ეკლესიის გადაწყვეტილება გარემოვაჭრეების აკრძალვის მოთხოვნით მონასტრის ეზოში არავინ შეეშვათ, შეიძლება იყოს თუ არა გამოწვეული მათივე ფინანსური ინტერესებიდან.

ჯვრის მონასტერთან მისულმა მცხეთის მერმა, გიორგი კაპანაძემ განაცხადა, რომ გარემოვაჭრეების გამო მონასტრის დაკეტვა მიუღებელი და სამარცხვინო ფაქტია. მერმა თქვა, რომ ადგილი, სადაც გარემოვაჭრეები დგანან მუნიციპალიტეტის ტერიტორიაა და არა მონასტრის.

"წვიმაში, თოვლში, ავდარში ეს ხალხი დგას აქ ამდენი წლის განმავლობაში და ვაჭრობს და მე უბრალოდ ადამიანური თვალსაზრისიდან გამომდინარე ვერ ავუკრძალავ მათ ლუკმა-პურის შოვნას", — განაცხადა კაპანაძემ.