ეროვნული სასწავლო ოლიმპიადის მეორე ტურის გამოცდა ქართულ ენასა და ლიტერატურაში უკვე გამოყენებული ტესტების გამო ჩაიშალა. მას შემდეგ, რაც მოსწავლეებმა წერა დაიწყეს, გაირკვა, რომ სკოლებს ტესტის შარშანდელი ვერსია მიაწოდეს.

შეფასებისა და გამოცდების ეროვნული ცენტრში ამბობენ, რომ შემთხვევით, შარშანდელი ტესტების ფაილი ამობეჭდეს და მთელი ქვეყნის მასშტაბით, 64 სკოლას გაუგზავნეს.

"წლევანდელი დავალებები უნდა დაბეჭდილიყო და ეს იყო ტექნიკური შეცდომა. სხვა ფაილი ამობეჭდეს, მოამზადეს, ჩააწყვეს პაკეტებში და გადაგზავნეს სკოლებს, დაახლოებით 1 140 ბავშვისთვის", — რუსთავი 2-თან საუბარში განმარტავს გამოცდების ცენტრის დირექტორის მოადგილე კახა ჯამბურია .

დღევანდელი სამსაათიანი ტესტირების შედეგები გაუქმდება, ხელახალი გამოცდა კი 13 იანვარს ჩატარდება.