რუსთავი-თბილისის მიკროავტობუსების მძღოლებმა აქცია გამართეს. მძღოლების თქმით, რუსთავის მერმა ახალი ტარიფის ჩამოხსნით და ძველის გაკვრით ისინი მგზავრებთან დააპირისპირა.

"შემოიჭრა ტრანსპორტში, რომელიც ხაზზე იყო და ხალხი ეჯდა. საერთოდ კანონის ჩარჩოებს გაცდა. ჩამოხსნა აღნიშნული ფასი და მიაკრა თავისი. მოუწოდა ხალხს არდამორჩილებისა და არგადახდისკენ", — აცხადებს აქციის მონაწილე ერთ-ერთი მძღოლი. მისი თქმით, ამ ქმედების გამო ხალხთან კამათი მოსდით და ამ რეჟიმში მუშაობა მათვის სახიფათოა.

მძღოლების თქმით, ხუთშაბათს საკრებულოს სხდომაზე მიიწვიეს, თუმცა ისინი დასწრებას არ აპირებენ მანამ, სანამ მერი მათ ბოდიშს არ მოუხდის.

მძღოლები აცხადებენ, რომ არ აპირებენ ბოიკოტის გამოცხადებას. მათი თქმით, არც ფასის დაწევა სურთ და მოსახლეობას ახალი ტარიფით მომსახურებიან. ახალი ტარიფით რუსთავი-თბილისის მიკროავტობუსით მგზავრობა 2 ლარი ღირს.