განათლების, მეცნიერების, კულტურისა და სპორტის მინისტრის მოადგილე, მიხეილ გიორგაძე თურქეთის კლინიკიდან გაწერეს. მან სამედიცინო დაწესებულება უკვე დატოვა. როგორც კულტურის სამინისტროს პრესსამსახურმა On.ge-ს უთხრა, გიორგაძე საქართველოში უახლოეს დღეებში დაბრუნდება და სახლში გააგრძელებს რეაბილიტაციის პროცესს. მისივე ინფორმაციით, მინისტრის მოადგილის ჯანმრთელობა გაუმჯობესებულია.

მიხეილ გიორგაძე 17 ნოემბერს ყვარელში ავარიაში მოყვა. რამდენიმე დღის განმავლობაში ის რეანიმაციაში მართვის სუნთქვაზე იყო.

საქმეზე უკვე დაიწყო გამოძიება სისხლის სამართლის კოდექსის 276-ე მუხლის პირველი ნაწილით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.