იუსტიციის უმაღლესი საბჭოს მოსამართლეების გადაწყვეტილებით, ოთხი მოსამართლე თანამდებობიდან გათავისუფლდა. ამ მოსამართლეებს შორის არიან დავით კეკენაძე, ასმათ კოხრეიძე, მიხეილ ბებიაშვილი და ირაკლი შავაძე.

უფლებამოსილების შეწყვეტის შესახებ გადაწყვეტილება იუსტიციის უმაღლესმა საბჭომ დღევანდელ სხდომაზე მიიღო.

სხდომის არამოსამართლე წევრის ნაზი ჯანეზაშვილის განცხადებით, ირაკლი შავაძის თანამდებობიდან გათავისუფლების ერთადერთი მიზეზი მისი განსხვავებული და კრიტიკული აზრია.

"მოგეხსენებათ, ირაკლი შავაძეს გარკვეული პრეტენზიები ჰქონდა უშუალოდ (სასამართლოს) თავმჯდომარესთან მიმართებაში, მაგრამ თავმჯდომარე თანამდებობაზე რჩება, მის მიმართ კითხვები არავის გასჩენია, თუმცა შავაძე სამსახურიდან მიდის", — განაცხადა ჯანეზაშვილმა.

ბათუმის საქალაქო სასამართლოს მოსამართლე ირაკლი შავაძე სასამართლოს თავმჯდომარეს დავით მამისეიშვილს ზეწოლაში და უფლებამოსილების გადამეტებაში ადანაშაულებდა. 22 თებერვალს იუსტიციის უმაღლესმა საბჭომ ირაკლი შავაძეს თანამდებობაზე უვადოდ გამწესებაზე უარი უთხრა. შავაძე ამბობდა, რომ ეს გადაწყვეტილება მისთვის მოსალოდნელი იყო და დავით მამისეიშვილს უკავშირდებოდა. მისივე თქმით, ბათუმის საქალაქო სასამართლოს თავმჯდომარე მის მიმართ არაკეთილგანწყობილი იყო და მის გადაწყვეტილებებზე გავლენის მოხდენას ცდილობდა.