ერთ-ერთი რამ, რაც რუსებს არ აკლიათ, თოვლია, თუმცა, როდესაც ციმბირის ერთ-ერთ, ქვანახშირის მწარმოებელ ქალაქში თოვლი მოვიდა, მოსახლეობა, როგორც ჩანს, მისი სითეთრით კმაყოფილი არ იყო, მთავრობამ კი პრობლემის გადაწყვეტის საუცხოო გზა მოიფიქრა.

The Moscow Times აცხადებს, რომ ქალაქ მისკში მთავრობამ პარკებში მოსული თოვლი თეთრად გადაღება, რათა მურისა და ქვანახშირის მტვრის კვალი დაეფარა.

ქვემოთ მოცემულ ვიდეოში ვხედავთ საახალწლოდ მორთულ პარკს, რომელიც თეთრი თოვლით არის დაფარული. თუმცა, დაკვირვებისას ცხადი ხდება, რომ თოვლი თეთრი წებოვანი ნივთიერებით არის დაფარული.

ვიდეოში ასევე ჩანს, თუ როგორ გადადის თეთრი წებოვანი საღებავი ხელებზე.

ქალაქი მისკი კუზნეცკის ქვანახშირის აუზში გვხვდება, რომელიც მსოფლიოში ქვანახშირის მოპოვების ერთ-ერთი ყველაზე დიდი ცენტრია. ეს ციმბირის ის რეგიონია, რომელიც ყველაზე მჭიდროდაა დასახლებული. ქალაქის ეკონომიკა კი ქვანახშირის მოპოვებაზე ძლიერადაა დამოკიდებული.

გაჩნდა ვარაუდი, რომ თეთრი საღებავი თოვლზე დალექილი მურის, ქვანახშირის მტვრისა და სხვა ნაწილაკების გადასაფარად გამოიყენეს, რომლებიც თოვლს ნაცრისფერ შესახედაობას ანიჭებდა.

მუქი ფერის თოვლი რუსეთში, რომელიც ქვანახშირის ერთ-ერთი ყველაზე დიდი მწარმოებელია, უცხო არ არის. ქვანახშირის წარმოებისას ჰაერში დიდი რაოდენობით შავი მტვერი გამოიყოფა, რაც თოვლს ამუქებს.

ქალაქის მმართველობამ თოვლის გადაღებვის გამო ბოდიში უკვე მოიხადა.

"საახალწლო განწყობის გაფუჭებისთვის ქალაქის მოსაახლეობას ბოდიშს ვუხდით", - აცხადებს ქალაქის ხელმძღვანელი დიმიტრი ივანოვი.