პატრიოტთა ალიანსის მოქმედი და ქართული ოცნების ყოფილი დეპუტატი, დავით ჭიჭინაძე აცხადებს, რომ ქართულმა ოცნებამ კიდევ ერთი ნაბიჯი გადადგა უკან და უარი უთხრა იმ დაპირების შესრულებაზე, რომელიც 6 წლის წინ გასცა.

"პირველ ტურში მე არ დამიჭერია მხარი ქართული ოცნებისთვის ისე, როგორც იმ 500 000 ადამიანს, მე ვეწინააღმდეგებოდი სალომე ზურაბიშვილის ირიბ დასახელებას და დავტოვე პარტია. ივანისვილის დაპირება იყო, რომ რადიკალური ცვლილებები იქნებოდა და მთავარი კრიტერიუმი იქნებოდა არა ერთგულება, არა პროფესიონალიზმი, სად არის თქვენზე მეტი პროფესიონალიზმი ქართულ ოცნებაში?", — სვამს კითხვას დეპუტატი.

მისივე თქმით, ეგონა, რომ "პარლამენტის თავმჯდომარე გადადგებოდა ეკა ბესელიაზე ადრე".

ამ გაცხადებას ქართული ოცნების რამდენიმე დეპუტატის პროტესტი მოჰყვა. სოფო კილაძემ დავით ჭიჭინაძეს მოუწოდა "სახე არ დაკარგოს".

"ნუ ეზმანებით სხვადასხვა თანამდებობეს, ნუ ეკვეხებით, ჩვენ რისი უფლება გვაქვს მაგას განახებთ ცოტა ხანში, მოსახლეობა გაგცემთ თქვენ საკადრის პასუხს, მაგ სიამოვნებას როგორ მოგაკლებთ", — უპასუხა დავით ჭიჭინაძემ ქართული ოცნების დეპუტატებს.

დღეს, 27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი