საქართველოს ნაკრების ვიცე კაპიტანი გურამ კაშია თავის საფეხბურთო კარიერაში ყველაზე ემოციურ დღეს იხსენებს. ვიტესის კაპიტნის პოსტის დატოვება ფეხბურთელისთვის მარტივი ნამდვილად არ ყოფილა, მაგრამ გაცილებით უფრო რთული იყო გამოსამშვიდობებელი მატჩი, რომელიც პირველ დეკემბერს გაიმართა.

21 დღის შემდეგ, ფეხბურთელმა გულშემატკივარს იმ დღის შესახებ დეტალურად უამბო. გაღვიძებიდან იმ მომენტამდე, როცა ცრემლიანი ისმენდა თუ როგორ სკანდირებდა მთელი მოედანი მის სახელს.

ფოტო: გურამ კაშია / ინსტაგრამის სთორი

იმ დღეს კაშიამ განსაკუთრებული საჩუქარი მიიღო. არნემის პარკში ირემს მისი სახელი დაარქვეს. ირემი ჯგუფის ლიდერია, ისეთივე, როგორიც თავად იყო ვიტესში. ეს რომ ემოციური იყო მისთვის, ადრეც უამბო გულშემატკივარს, მაგრამ ახლა უფრო მეტი დეტალები გაგვიმხილა.

"ხალხი მთხოვდა დავბრუნებულიყავი, რაც ჩემთვის ძალიან სასიამოვნო იყო. მათ ისევ ვჭირდები და ისევ მაფასებენ... რა მაგარია, არა?!" — წერს ფეხბურთელი.

"მკერდგამოწეული დავდიოდი და ყველას ვესალმებოდი", — კაშია გვიამბობს, რომ განსაკუთრებულ პატივისცემას გრძნობდა, რაც მის დღეს უფრო ემოციურს ხდიდა. თუმცა, ყველაფერი მაშინ შეიცვალა, როცა მთელმა მოედანმა, ძველებურად, მისი სახელის სკანდირება დაიწყო.

37 წუთი გახდა და ისევ დაიწყო, გურამ კაააშია, გურააამ კააშიააა, ისევ ემოციები მომაწვა და გავიფირე, ნეტავ ქართველი ხალხი უყურებდეს როგორი ამაყი ვიქნებოდი-თქო

გურამ კაშია

ფოტო: გურამ კაშია / ინსტაგრამის სთორი

როგორც გვიამბობს, მატჩის დასრულების შემდეგ მოედნის დაცლას ელოდა, მაგრამ ასე არ მოხდა.

ფოტო: გურამ კაშია / ინსტაგრამის სთორი

აქ ფეხბურთელი თხრობას წყვეტს. თუმცა, ყველას კარგად ახსოვს, რა მოხდა შემდეგ. მოედანზე მის პატივსაცემად უზარმაზარი ბანერი გაიშალა, რომელიც მის ვიტესში მოღვაწეობას სრულად ასახავდა.

ფოტო: გურამ კაშია / Instagram

მთელი მოედანი ისევ ქართველი ფეხბურთელის სახელს სკანდირებდა. ცრემლიანი კაშია კი ამაყად იდგა და იღებდა ხალხის იმ სიყვარულსა და პატივისცემას, რომელსაც დაუღალავი შრომით მიაღწია.

ფოტო: გურამ კაშია / Instagram