რადმენიმე წუთის წინ ცნობილი გახდა, რომ მანჩესტერ იუნაიტედმა პორტუგალიელი თავკაცი, ჟოზე მოურინიო სამსახურიდან გაუშვა.

ამის შესახებ ინფორმაცია კლუბის ოფიციალურმა საიტმა გაავრცელა.

"კლუბი მადლობას უხდის ჟოზეს ოლდ ტრაფორდზე გაწეული სამსახურისთვის და მომავალში წარმატებას უსურვებს", - ნათქვამია განცხადებაში.

ჯერჯერობით უცნობია ვინ იქნება მანჩესტერ იუნაიტედის ახალი მწვრთნელი. კლუბის განცხადებაში წერია, რომ იუნაიტედი ახალ თავკაცს მიმდინარე სეზონის ბოლომდე წარადგენს. რამდენიმე თვეა აქტიუირად მიმდინარეობს საუბარი ზინედინ ზიდანზე, რომელმაც მადრიდის რეალი გასულ სეზონს დატოვა, თუმცა კლუბი სხვა ვარიანტებსაც განიხილავს.

ჟოზე მოურინიო მანჩესტერ იუნაიტედის მწვრთნელად ლუის ვან გაალის ნაცვლად, 2016 წელს დაინიშნა. 2,5 წლის განმავლობაში ჟოზე მოურინიომ გუნდთან ერთად სამი ტიტული მოიგო, მათ შორის ევროპის ლიგა.

პორტუგალიელმა მწვრთნელმა მიმდინარე სეზონი კატასტროფული შედეგებით დაიწყო, რაც მისი დათხოვნის მთავარი მიზეზი გახდა. გარდა წარუმატებელი სეზონისა, მოურინიოს რამდენიმე ფეხბურთელთან კონფლიქტიც ჰქონდა. ერთ-ერთი მათგანი პოლ პოგბაა, რომელიც გავრცელებული ინფორმაციით, გუნდის დატოვებასაც ფიქრობდა.