საქართველოს ყოფილი პრეზიდენტი, მიხეილ სააკაშვილი ნაციონალური მოძრაობის წევრის, დავით კირკიტაძის დაკავებას ეხმაურება და ამბობს, რომ ამით საქართველოში რუსული ტიპის რეჟიმი, ივანიშვილისა და "რუსეთის საგარეო დაზვერვის აგენტის", გახარიას მიერ მყარდება:

"კეთილი იყოს თქვენი მობრძანება რუსულ საქართველოში... ესაა რუსული რეჟიმი, რუსული პენსიებისა და შემოსავლების გარეშე".

მიხეილ სააკაშვილი საქართველოს მოსახლეობას მიმართავს, რომ მათი პარტიის წევრებს გვერდით დაუდგნენ:

"მე მესმის ყველას ვერ მოთხოვ და უმეტესობას ვერ მოთხოვ ქუჩაში დგომას, მითუმეტეს, რომ თქვენ უკვე მიეცით ხმები არჩევნებზე და არჩევნები მოიპარა ივანიშვილმა. იცოდეთ, რომ კირკიტაძის განეიტრრალებით, მელიას განეიტრალებით, აქტიური რეგიონების ხალხის განეიტრალებით, ივანიშვილი გართმევთ ბოლო იმედს რომ ოდესმე ამოძვრეთ ამ ნეხვიდან, სადაც ის ძირავს საქართველოს".

ერთიანი ნაციონალური მოძრაობის წევრი, დავით კირკიტაძე პოლიციამ კახეთში დღეს, 17 დეკემბერს დააკავა. კირკიტაძე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის დააკავეს

ოპოზიციის ლიდერი და ველისციხეში მომხდარი ინციდენტის ერთ-ერთი მონაწილე სისხლის სამართლის კოდექსის 353-ე მუხლით დააკავეს, რაც პოლიციის მიმართ მისი საქმიანობის შეწყვეტის მიზნით წინააღმდეგობასა და ძალადობას გულისხმობს.

დაპირისპირება ველისციხეში

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.

18 დეკემბრიდან გაერთიანებული ოპოზიცია "უწყვეტ" აქციებს აანონსებს. გრიგოლ ვაშაძის განცხადებით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.