საქართველოს პარლამენტის თავმჯდომარის, ირაკლი კობახიძის განცხადებით, 16 დეკემბრიდან ამოქმედდება პარლამენტის ახალი რეგლამენტი, რომელიც დეპუტატების ეთიკის საკითხებს დაარეგულირებს.

მისივე განმარტებით, ასევე ამოქმედდება საკონსტიტუციო ცვლილება, რომლის მიხედვითაც, თუ დეპუტატი არ ესწრება სხდომების ნახევარზე მეტს, მას უწყდება უფლებამოსილება.

ირაკლი კობახიძის თქმით, კონკრეტული სანქციები ამოქმედდება რეგისტრაციასთან დაკავშირებითაც, რაც, პარლამენტის თავმჯდომარის შეფასებით, გაცდენების პრობლემას დაძლევს.

"გასული სესიების განმავლობაში, იყო რამდენიმე დეპუტატი, რომელიც არ დაესწრო სხდომების ნახევარზე მეტს სესიის განმავლობაში. აქედან გამომდინარე, მომავალში ეს უკვე გახდება უფლებამოსილების შეწყვეტის საფუძველი, თუ მომავალში განმეორდება ასეთი რამ. გარდა ამისა, რეგისტრაციასთან დაკავშირებით ამოქმედდება კონკრეტული სანქციები. ამით დაიძლევა ის პრობლემა, რომელიც არის დაკავშირებული გაცდენებთან", — აღნიშნა პარლამენტის თავმჯდომარემ.

დეპუტატების დასწრების პრობლემა პლენარულ სხდომაზე ახალი პრობლემა არ არის. თუმცა ეს საკითხი მწვავედ მაშინ დადგა, რაც ქვეყნის მთავარი ფინანსური დოკუმენტის დასამტკიცებლად დეპუტატების საკმარისი რაოდენობა ვერ შეიკრიბა და მისი განხილვა გადაიდო.

გაიგე მეტი საქართველოს პარლამენტის ახალ რეგლამენტზე, რომელიც ეთიკისა და გაცდენის საკითხებს დაარეგულირებს.