დღეს, 12 დეკემბერს საქართველოსა და რუსეთის ფედერაციას შორის ჟენევის საერთაშორისო მოლაპარაკების 46-ე რაუნდი გაიმართება. შეხვედრა ევროკავშირის, გაეროს, ეუთოს თანათავმჯდომარეობითა და აშშ-ის მონაწილეობით შედგება.

საგარეო საქმეთა სამინისტროს ინფორმაციით, საგარეო საქმეთა მინისტრის მოადგილე, ლაშა დარსალია რუსეთის მხრიდან ოკუპაციითა და ანექსიით გამოწვეულ პრობლემებზე ისაუბრებს. უწყება განმარტავს, რომ განსაკუთრებული ყურადღება დაეთმობა გალსა და ახალგორში, აგრეთვე საოკუპაციო ხაზის მიმდებარე სოფლებში არსებულ რთულ ვითარებას. გარდა ამისა, თავისუფალი გადაადგილების შეზღუდვასა და სოკუპირებულ ტერიტორიებზე დარჩენილი ქართველების ეთნიკური დისკრიმინაციის გაძლიერებას.

"საქართველოს წარმომადგენლები დასვამენ საოკუპაციო ხაზზე მავთულხლართებისა და ხელოვნური ბარიერების აღმართვის საკითხს და ყურადღებას გაამახვილებენ სოფელ ატოცში მიმდინარე უკანონო პროცესებზე. ქართველი მონაწილეები კვლავ დააყენებენ არჩილ ტატუნაშვილის, გიგა ოთხოზორიასა და დავით ბაშარულის სიცოცხლის ხელყოფის საქმეებზე მართლმსაჯულების აღსრულების აუცილებლობის საკითხს", — განმარტებულია საგარეო საქმეთა სამინისტროს მიერ გავრცელებულ განცხადებაში.