ჟურნალმა Time-მა წლის ადამიანი დაასახელა. 2017 წლის მგავსად რედაქციამ გადაწყვიტა, რომ აღნიშნული წოდება მათ არა ერთ ადამიანს, არამედ ჯგუფს, ამ შემთხვევაში ჟურნალისტებს მიანიჭონ, რომლებმაც სიცოცხლე და თავისუფლება სიმართლის ძებნას შესწირეს. წლის ადამიანები გახდნენ მოკლული საუდელი ჟურნალისტი ჯამალ ხაშოგი, ამერიკული გამოცემა Capital Gazette, ფილიპინელი მარია რესა და მიანმარში დაკავებული Reuters-ის ჟურნალისტები.

Time-მა მათ "მცველები" უწოდა. გამოცემას აღნიშნული აქვს, რომ ისინი წლის ადამიანებად დაასახელეს ჭეშმარიტების სარისკო ძებნისთვის, ფაქტების არასრულყოფილი, მაგრამ აუცილებელი ძებნისთვის, გაბედული განცხადებებისთვისა და გამოსვლებისთვის.

ჯამალ ხაშოგი

ფოტო: Time

საუდელი ჟურნალისტი ჯამალ ხაშოგი საუდის არაბეთიდან დევნილი ჟურნალისტი იყო, რომელიც The Washington Post-ის მესვეტედ მუშაობდა. მიმდინარე წლის 2 ოქტომბერს ის სტამბოლში, საუდის არაბეთის საკონსულოში შევიდა, სადაც ის მოკლეს. მის მკვლელობასთან აკავშირებენ აუდის პრინცს, მუჰამედ ბინ სალმნასა და მის გარემოცვას.

Capital Gazette

ფოტო: Tim

მიმდინარე წლის 28 ივნისს ანაპოლისში შეიარაღებული კაცი, ჯერორდ რამოსი Capital Gazette-ის რედაქციას თავს დაესხა. ეს ერთ-ერთი ყველაზე ძველი გამოცემაა აშშ-ში. თავდასხმის შედეგად დაიღუპა რედაქტორის თანაშემწე, რობ ჰიასენი, სვეტების რედაქტორი ჯერალდ ფიშმანი, გაყიდვების მენეჯერი რებეკა სმიტი, სპეციალური კორესპონდენტი ვენდი ვინტერსი და ჟურნალისტი ჯონ მაკნამარა. თავდამსხმელი აქამდე ჟურნალისტებს არაერთხელ დამუქრებია, რადგან 2011 წელს მისი სისხლის სამართლის საქმეზე დაწერეს.

მარია რესა

ფოტო: Time

მარია რესა ფილიპინელი ჟურნალისტი და საიტ Rappler-ის გენერალური დირექტორია, რომელიც ამავე დროს აშუქებს "ნარკოტიკებთან ომს", რომელიც პრეზიდენტმა როდრიგო დუტერტემ წამოიწყო. უფლებადამცველების შეფასებით, ხელისუფლების მოქმედებების შედეგად 12 ათასზე მეტი ადამიანი დაიღუპა. ნოემბერში რესას გადასახადებისგან თავის არიდებისათვის ბრალდება წაუყენეს.

ვან ლონი და კია სო ო

ფოტო: Time

Reuters-ის ჟურნალისტები ვან ლონი და კია სო ო მიანმარში დააპატიმრეს. მათ სახელმწიფო საიდუმლოს გამჟღავნებისთვის შვიდწლიანი პატიმრობა მიუსაჯეს. ორივე ჟურნალისტი მიანმარში როჰინჯი მოსახლეობის დევნასა და მკვლელობებს აშუქებდა.