ევროპული საქართველოს ერთ-ერთმა ლიდერმა, გიგი უგულავამ განაცხადა, რომ კვირას გაერთიანებული ოპოზიციის აქციაზე მიდის. უგულავამ ამის შესახებ ფეისბუქზე დაწერა.

უგულავა წერს, რომ მთავარი პარლამენტის პროპორციული არჩევნებია და ამ მიზნის მისაღწევად ყველა აქცია, დისკუსიის ფორმატები და საერთაშორისო ბერკეტები უნდა გამოვიყენონ.

"აქციებზე ყოველთვის გაისმის გვერდითი იდეები, არასწორი და ხშირად მიუღებელი განცხადებები. ეს თანმდევი პროცესია. ასეთი რამ ცხადია უნდა გავაპროტესტოთ, მაგრამ მთავარი თემიდან ფოკუსი არ უნდა გადავიტანოთ. პროპორციული საპარლამენტო არჩევნების გარშემო უნდა გავერთიანდეთ, სხვა თემებზე ცხადია გვექნება განსხვავებული პოზიციები. აქ ევროპული საქართველოს, როგორც საპარლამენტო უმცირესობის, როლი განსაკუთრებულია. ამიტომ მე მივდივარ კვირის აქციაზე", — წერს უგულავა.

გაერთიანებული ოპოციზიის საპრეზიდენტო კანდიდატმა, გრიგოლ ვაშაძემ არჩევნების მეორე ტურის შედეგები არ აღიარა. ამის შესახებ მან ფილარმონიაში, მოქალაქეებთან შეხვედრის დროს განაცხადა.

"საქართველოს პრეზიდენტი არ ჰყავს", — თქვა მან და ვადამდელი საპარლამენტო არჩევნების მოთხოვნით ორ დეკემბერს თბილისში, პარლამენტის წინ აქცია დააანონსა. აქციაზე ისმოდა შეძახილები "ბრძოლა, ბრძოლა", სკაიპით ჩართულ ექსპრეზიდენტს კი ეძახდნენ "ჩამოდის".

დღეს, 30 ნოემბერს ევროპულმა საქართველომ განაცხადა, რომ აქციას არ შეუერთდებიან. დავით ბაქრაძის თქმით, შექმნილ ვითარებაში ლეგიტიმური და გასაგებია იმ ხალხის წუხილი და პროტესტი, რომელიც უკმაყოფილოა არჩევნების შედეგით, თუმცა პარტია ბრძოლას პოლიტიკური რეფორმებით აპირებს.

"პოლიტიკური ბრძოლის გზა გადის პოლიტიკურ რეფორმებზე და არა საპროტესტო აქციებზე", — განაცხადა მან.