ლიეტუვის საგარეო საქმეთა მინისტრის, ლინას ლინკევიჩუსის განცხადებით, საქართველოში საპრეზიდენტო არჩევნების შუა კვირაში დანიშვნა სიურპრიზია და არატრადიციულია.

"არ ვიცი რამდენად შეუწყობს ხელს ეს ხმის მიცემის პროცესში თავისუფალ და გამჭვირვალე მონაწილეობას. ეს ნამდვილად გარკვეულ ეჭვებს ბადებს", — საგარეო საქმეთა მინისტრის განცხადების თარგმანს რუსთავი 2 ავრცელებს.

ლინკევიჩუსის განმარტებით, არჩევნები არის დემოკრატიის ტესტი გამჭვირვალეობის კუთხით, როგორ არის ორგანიზებული რეფორმების გატარება, რადგან ხელისუფლების შეცვლამ ან არ შეცვლამ არ უნდა მოახდინოს უარყოფითი გავლენა რეფორმების მოტივაციაზე.

"კერძოდ, რასაც ველით საქართველოსგან ევროინტეგრაციის თუ ევროატლანტიკური ინტეგრაციის კუთხით, პირველ რიგში, საქართველოს ხელისუფლება ამას სერიოზულად და პასუხისმგებლობით უნდა მიუდგეს. ტესტი კი საკმაოდ გადამწყვეტია".

საპრეზიდენტო არჩევნების მეორე ტური სამუშაო დღეს, 28 ნოემბერს დაინიშნა. მიუხედავად სხდომის რამდენიმე წევრის წინააღმდეგობისა, ცესკომ გადაწყვეტილება არ შეცვალა. მანამდე საარჩევნო ადმინისტრაციას არჩევნების შაბათ-კვირას დანიშვნისკენ მოუწოდა არასამთავრობო სექტორმაც.

მათ ის პრობლემებიც დაასახელეს, რასაც არჩევნების სამუშაო დღეს დანიშვნა გამოიწვევდა. მათ შორისაა ემიგრანტების ჩართულობა, შიდა მიგრაცია და არჩევნებზე გავლენა. ცესკოში გადაწყვიტეს იმისთვის, რომ მიგრანტებს ხმის მიცემის პრობლემა არ შეექმნათ უცხოეთში საარჩევნო უბნები ადგილობრივი დროით 12 საათამდე იმუშავებენ.