გაერთიანებული ოპოზიციის საპრეზიდენტო კანდიდატი, გრიგოლ ვაშაძე მთავრობის ინიციატივას ვალების ჩამოწერის შესახებ ტრიუკსა და სასოწარკევთილებას უწოდებს. მისი თქმით, მთავრობის ნაბიჯი წაგების შიშითაა მოტივირებული.

"ე.წ. ქართული ოცნების ხელისუფლება კიდევ ცდილობს, ის, რაც ხდება რუტინულად ყოველი წლის ბოლოს, გაასაღოს ინიციატივად. ბანკები ყოველი წლის ბოლოს ისედაც ჩამოწერენ ხოლმე უიმედო სესხებს. შარშან ჩამოწერეს 75 მილიონზე მეტი. არავითარი მილიარდ-ნახევარი არ იქნება, დარწმუნებული იყავით, ეს არის ტრიუკი, სასოწარკვეთილება და სხვა არაფერი", — აღნიშნა ძალა ერთობაშიას პრეზიდენტობის კანდიდატმა.

არჩევნების მეორე ტურამდე რამდენიმე დღით ადრე მთავრობა "შავ სიაში" მყოფ 600 ათასი ადამიანს ჯამში 1,5 მილიარდის ოდენობის დავალიანებას უნულებს. საჭირო ფინანსური ტვირთი კი სრულად ქართუ ჯგუფმა იკისრა.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადაუხდია სესხის ნაწილი;
  • ფინანსთა მინისტრის, ივანე მაჭავარიანის თქმით, მიკროსაფინანსო კომპანი ვივუსის კლიენტებს დავალიანება არ გაუნულდებათ. მინისტრის განმარტებით, კომპანია მოლაპარაკებების პირობებს არ დათანხმდა.

სამართლიანი არჩევნების აღმასრულებელი დირექტორი, მიხეილ ბენიძე მიიჩნევს, რომ მთავრობის ინიციატივა ვალების ჩამოწერის შესახებ ამომრჩევლის მოსყიდვაა. მისივე თქმით, 100 ლარზე მეტი ოდენობის თანხით მოსყიდვაზე პასუხისმგებელია პროკურატურა და უწყება საქმით უნდა დაინტერესდეს. ამავე პოზიციაზეა საქართველოს ახალგაზრდა იურისტთა ასოციაციის აღმასრულებელი დირექტორი, ირმა პავლიაშვილიც. იგი აცხადებს, რომ ვალების ჩამოწერის გეგმა ამომრჩევლის მოსყიდვის ნიშნებს შეიცავს.

ვალების ჩამოწერაზე მთავრობის ინიციატივას პროკურატურა შეისწავლის. მათი თქმით, დანაშაულის ნიშნების არსებობის შემთხვევაში შესაბამის გადაწყვეტილებას მიიღებენ.