დღეს, 13 ნოემბერს სტრასბურგში, ევროპარლამენტის პლენარულ სესიაზე საქართველოს მიერ ასოცირების შეთანხმების შესრულების შესახებ ანგარიშს განიხილავენ. დოკუმენტის მომხსენებელია ევროპარლამენტარი ანდეირს მამიკინსი.

ანგარიშში ნათქვამია, რომ ევროკავშირი საქართველოს ხელისუფლებას, ასოცირების შეთანხმებით გათვალისწინებული დარჩენილი ვალდებულებების შესრულებისკენ მოუწოდებს. მათ შორის, რეფორმების ატარებისკენ, შრომითი სტანდარტების, გარემოს დაცვის, მოწყვლადი ჯგუფებისა და ქალთა მიმართ დისკრიმინაციის აღმოფხვრის კუთხით. მოხსენებაში დადებითადაა შეფასებული ის საკანონმდებლო და ინსტიტუციური ნაბიჯები, რაც ზემოთხსენებულ საკითხების მოსაგვარებლად გადაიდგა.

დოკუმენტში ნათქვამია, რომ 2017-2020 წლებისთვის ევროკავშირი საქართველოს 317-დან 453 მილიონ ევრომდე ოდენობის დახმარებას გამოუყოფს.

პოლიტიკური დიალოგი

ევროკავშირი კიდევ ერთხელ ხაზს უსვამს, რომ ევროკავშირის პოზიცია ემთხვევა ვენეციის კომისიის დასკვნას საქართველოში განხორციელებულ საკონსტიტუციო რეფორმებზე. თუმცა, ამავე დროს, მწუხარებას გამოთქვამს პროპორციული საარჩევნო სისტემის 2024 წლამდე გადადების გამო.

ევროკავშირი მოუწოდებს საქართველოს ხელისუფლებას, გამოიძიოს 2016 წლის საპარლამენტო არჩევნების დროს მომხდარი პოლიტიკურად მოტივირებული ძალადობის ინციდენტები.

ევროკავშირი მიესალმება სავიზო ლიბერალიზაციის პროცესის ეფექტიან განხორციელებას და მოუწოდებს წევრ სახელმწიფოებს, საქართველო უსაფრთხო ქვეყნად გამოაცხადოს.

რეზოლუციაში ნათქვამია, რომ ევროკავშირი კიდევ ერთხელ გამოხატავს საქართველოს ტერიტორიული მთლიანობის მხარდაჭერას. იქვე აღნიშნულია, ოთხოზორია-ტატუნაშვილის სიის შესახებ საქართელოს პარლამენტში მიღებული დოკუმენტი.

ევროკავშირის რეზოლუციაში ხაზგასმულია ისიც, რომ საერთაშორისო საზოგადოებამ უნდა მიიღოს თანმიმდევრული და კოორდინირებული, ერთიანი, მტკიცე პოზიცია რუსეთის ოკუპაციისა და ანექსიის პოლიტიკის წინააღმდეგ.

ევროკავშირი მოუწოდებს საქართველოს ხელისუფლებას, დაძლიოს არსებული დაბრკოლებები და ეცადოს სავაჭრო შეთანხმებითა და ასოცირების ხელშეკრულებით მიღებული სარგებელის გამოყენების შესაძლებლობა, ოკუპირებულ ტერიტორიებზე მცხოვრებლებსაც მიეცეს.

კანონის უზენაესობა

ევროკავშირი ღრმა შეშფოთებას გამოთქვამს თურქეთის ზეგავლენის გამო, როგორც საქართველოში მცხოვრებ თურქებზე, ასევე საგანმანათლებლო ინსტიტუტებზე. მაგალითად, საქმე ეხება, შავი ზღვის საერთაშორისო უნივერსიტეტს.

ევროკავშირი მოუწოდეს საქართველოს ხელისუფლებას, გამოძიების პროცესში დარწმუნდეს, რომ ყველა სამართლებრივი პროცედურა ჩატარებული იქნება ევროპული პრინციპებისა და სტანდარტების დაცვით. რეზოლუციით მოუწოდებენ ევროკავშირის წევრ სახელმწიფოებს, მხარი დაუჭირონ და დაეხმარონ აღმოსავლეთ პარტნიორობის წევრ ქვეყნებს, გაუმკლავდნენ თურქეთის ზეწოლას.

ევროკავშირი მოუწოდებს საქართველოს პარლამენტს, განიხილოს ნარკოპოლიტიკის რეფორმირების ცვლილებების პაკეტი, რაც 2017 წლის ნოემბერში მიღებული კონსტიტუციითაა გათვალისწინებული.

ადამიანის უფლებები

რეზოლუციაში საუბარია თბილისიდან გატაცებულ აზრებაიჯანელ ჟურნალისტზე, აფგან მუხტარლიზე. რეზოლუციით, ევროკავშირი მოუწოდებს საქართელოს ხელისუფლებას გააუმჯობესოს ადამიანის უფლებების კოორდინაციის მექანიზმი. დოკუმენტის თანახმად, აფგან მუხტარლის გატაცების საქმის გამოძიებაში პროგრესის არარსებობის გამო ისინი შეშფოთებას გამოხატავენ.

ევროკავშირი მოუწოდებს საქართველოს მთავრობას, დამატებით ნაბიჯები გადაიდგას, როგორც ქალთა მიმართ ყველა ტიპის ძალადობის წინააღმდეგ, ასევე, სამუშაო და საჯარო ადგილებზე სექსუალური ძალადობისა და სექსუალური შევიწროვების წინააღმდეგ. დოკუმენტში ასევე ნათქვამია ისიც, რომ საქართველოში უნდა გაიზარდოს ქალთა წარმომადგენლობა შრომის ბაზარზე და პოლიტიკაში.

დოკუმენტში საუბარია ყოფილი პრემიერ-მინისტრის, ვანო მერაბიშვილის საქმეზე. რეზოლუციაში აღნიშნულია სტრასბურგის სასამართლოს გადაწყვეტილების აღსრულების მნიშვნელობა, რომელიც ადგენს ადამიანის უფლებათა ევროპული კონვენციის მე-18 მუხლის დარღვევას.

რეზოლუციის ტექსტით მოუწოდებენ საქართველოს ხელისუფლებას, დამატებითი ნაბიჯები გადაიდგას მოწყვლადი ჯგუფების დასახმარებლად, სიძულვილის ენისა და დისკრიმინაციის წინააღმდეგ.

საქართველოს მიერ ევროკავშირთან ასოცირების შეთანხმების შესრულების შესახებ ანგარიში ევროპარლამენტის საგარეო ურთიერთობათა კომიტეტმა 9 ოქტომბერს დაამტკიცა.