კირკუკში, ქურთისტანის რეგიონში, სამართალდამცავებმა არასრულწლოვანი, არაბი მოზარდი დააკავეს, რომელსაც შაჰიდის ქამარი ეკეთა. ინფორმაციას Thelegraph ავრცელებს.

ადგილობრივმა ტელევიზიებმა გაავრცელეს ვიდეო, სადაც სპეცოპერაციის მიმდინარეობაა ასახული. კადრებში ჩანს, რომ სამართალდამცავებმა აფეთქების თავიდან არიდება მოახერხეს, მოზარდს თვითმკვლელის ქამარი მოხსნეს და დაკითხვაზე წაიყვანეს.

კირკუკის პოლიციის უფროსმა, ხატაბ ომარმა განცხადება გააკეთა, სადაც აღნიშნა რომ შესაძლო ტერორისტულ აქტზე მათ ინფორმაცია წინასწარ მიიღეს და სწრაფი რეაგირება მოახდინეს. მათივე ინფორმაციით, დაკავებული ისლამური სახელმწიფოს წევრი იყო.

გარდა ამისა, ხატაბ ომარმა აღნიშნა, რომ სპეცოპერაციის კადრების ტელევიზიითა და სოციალური ქსელით გავრცელებამ სამართალდამცავ ორგანოებს ტერაქტის ორგანიზების მონაწილე სხვა წევრების დაკავებაში ხელი შეუშალა.

რამდენიმე დღის წინ ტერაქტი თურქეთშიც მოხდა. ტერაქტთან დაკავშირებით რეჯეპ ტაიპ ერდოღანმა განაცხადა, რომ ქალაქ გაზიანთეფში ტერორისტული აქტი 12-დან 14 წლამდე პირმა მოაწყო. ქვეყნის პრეზიდენტმა განმარტა, რომ თვითმკვლელი ტერორისტის უკან ე.წ. ისლამური სახელმწიფო დგას.