თავდაცვის მინისტრი, ლევან იზორია სუსის მიერ ჩატარებულ გამოძიებას სრულ ნდობას უცხადებს და განმარტავს, რომ უწყებამ საკმარისი მტკიცებულებები მოიპოვა იმის დასადასტურებლად, რომ სახელმწიფოს უსაფრთხოება საფრთხის ქვეშ იდგა:

"როდესაც სახელმწიფო უსაფრთხოების სამსახური აკეთებს განცხადებას, რომ სერიოზული საფრთხის თავიდან აცილება ხდებოდა, ბუნებრივია, ამის აბსოლუტური ნდობა მაქვს. აქ კონკრეტული გარემოებები და მტკიცებულებებით არის საუბარი და არა ვარაუდის დონეზე. კავშირები და რა დავალებებს იღებდნენ, ამის შესახებ, ბუნებრივია სასამართლო არსებითი განხილვის პროცესში ყველა გაიგებთ ინფორმაციას".

სუსის მიერ გავრცელებულ ინფორმაციას იმასთან დაკავშირებით, რომ უწყებამ ტერორისტული აქტი აღკვეთა, ოპოზიციური პარტიებისგან და სამხედრო ექსპერტებისგან არაერთგვაროვანი შეფასებები მოჰყვა. როგორც სამხედრო ექსპერტმა, ნოდარ ხარშილაძემ განმარტა, მომხდარის ტერაქტად შეფასება ხელისუფლების წინასაარჩევნო ხრიკია.

22 აგვისტოს სახელმწიფო უსაფრთხოების სამსახურმა განაცხადა, რომ კონტრდაზვერვის დეპარტამენტმა ტერორისტული აქტი აღკვეთა, რომლის შედეგადაც სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქება იგეგმებოდა. ტერაქტის მომზადების ბრალდებით დღეს შვიდი პირი დააკავეს.