დღეს სახელმწიფო უსაფრთხოების სამსახურის მიერ ე.წ. ტერაქტის საქმეზე ერთ-ერთი დაკავებული საავადმყოფოშია გადაყვანილი. მას თავის ქალის დაზიანების გამო ოპერაცია ჩაუტარდა.

როგორც On.ge-ს სუს-ის პრესსამსახურში განუცხადეს, ბრალდებულმა ბექა ბ.-მ, დაკავების დროს გაქცევა სცადა და სწორედ მაშინ დაშავდა:

"ადგილი არ ჰქონია დაკითხვის დროს ფიზიკურ ზეწოლას და ცემის ფაქტს, დაკავების დროს სცადა გაქცევა ბექა ბ.-მ და დაზიანებები მიიღო, როგორც ვიცით მისი ოპერაცია უკვე დასრულდა და მისი მდგომარეობა ნორმალურია".

დღეს, სახელმწიფო უსაფრთხოების სამსახურმა განაცხადა, რომ მისმა თანამშრომლებმა ტერორისტული აქტი აღკვეთეს და 7 მოქალაქე დააკავეს.

უწყების ინფორმაციით, კონტრდაზვერვის დეპარტამენტმა 2016 წლის 20 აგვისტოს ტერორისტული აქტის ჯგუფურად მომზადებისათვის და ტერორისტული მიზნით ცეცხლსასროლი იარაღის, საბრძოლო მასალისა და ფეთქებადი ნივთიერებების უკანონო შეძენა-შენახვა, ტარებისა და ამავე დანაშაულის ჩადენაში დახმარების ბრალდებით საქართველოს 5 მოქალაქე დააკავა. გარდა ამისა, სამსახურებრივი უფლებამოსილების გადამეტების ფაქტზე დაკავებულია საპატრულო პოლიციის მოქმედი თანამშრომელი, დანაშაულის შეუტყობინებლობის ფაქტზე საქართველოს ერთი მოქალაქე.