საპარლამენტო უმრავლესობის ლიდერი და პარლამენტის ვიცე-სპიკერი, თამარ ჩუგოშვილი თბილისში, რუსთაველის გამზირზე კარვების გაშლის ხელშეშლის შესახებ თბილისის მერიასა და შინაგან საქმეთა სამინისტროს ფეისბუქით მიმართავს. მიმართვა დეპუტატმა შვილმოკლული მამისთვის, ზაზა სარალიძისთვის კარვის გაშლის უფლების შეზღუდვის შემდეგ გამოაქვეყნა.

"არ არსებობს ნორმა რომელიც კრძალავს კარვის გაშლას თუ ეს არ ქმნის ხელოვნურ დაბრკოლებას ტრანსპორტისთვის ან ორგანიზაციის ფუნქციონირებას არ უქმნის რეალურ საფრთხეს. მერიას და შინაგან საქმეთა სამინისტროს მოვუწოდებ გაითვალისწინონ კანონის ეს მოთხოვნა", — წერს ჩუგოშვილი.

On.ge ცდილობს შინაგან საქმეთა სამინისტროს პრესსამსახურისგან კარვების გაშლის ხელშეშლის მიზეზების შესახებ კომენტარის მიღებას.

რამდენიმე დღის წინ შვილმოკლულმა მამამ, ზაზა სარალიძემ თბილისის მერიისგან წერილი მიიღო, სადაც აღნიშნული იყო, რომ თბილისში, პარლამენტის შენობის მიმდებარე ტერიტორია უნდა დაეტოვებინა. მიზეზი ახალი წლისთვის ნაძვის ხის დადგმა იყო.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

თბილისის მერიისგან ზაზა სარალიძისთვის მსგავსი შინაარსის კომუნიკაციის გამო არასამთავრობო ორგანიზაციებმა 10 ნოემბრისთვის აქცია "კარვებით ვიცავთ თავისუფლებას!" დააანონსეს. დღევანდელ, 10 ნოემბრის აქციაზე პოლიციის თანამშრომლებმა კარვის გაშლის საშუალება არ მისცეს ზაზა სარალიძეს, თუმცა არასამთავრობო ორგანიზაციებმა პროტესტის ეს ფორმა მაინც გამოიყენეს.