ორგანიზაცია ბუნების კონსერვაციის გაერთიანება აცხადებს, რომ ბორნეული ორანგუტანი მომავალ ათ წელიწადში სრულად გადაშენდება, იმ შემთხვევაში თუ ინდონეზიასა და მალაიზიაში ტყეების გაჩეხვა არ შეწყდება.

ბოლო 25 წლის განმავლობაში, ინდონეზიაში, სადაც ბორნეული ორანგუტანი ბინადრობს, 31 მილიონი ჰექტარი ტყე გაიჩეხა. თვალსაჩინოებისთვის - აღნიშნული ტერიტორია გერმანიის ფართობის ტოლია, ხოლო საქართველოს ფართობზე შვიდჯერ მეტი.

ტყეების გაჩეხვის უმთავრესი მიზეზი მათ ადგილას პალმების პლანტაციების გაშენებაა, საიდანაც ზეთს იღებენ, რომელიც სხვადასხვა პროდუქტების წარმოებაში გამოიყენება.

ტყეებში ხშირად აჩენენ ხანძარს, რათა ეს ტერიტორიები ახალი პლანტაციებისთვის გაათავისუფლონ.

ფოტო: KYTan / Shutterstock

ცხადია, გაჩეხვის პროცესი მხოლოდ ორანგუტანებს არ უქმნის საფრთხეს. ამ რაოდენობის ხის გაჩეხვა სხვა ცხოველებისთვისაც საშიშია და რა თქმა უნდა, თავად ადამიანებისთვისაც.

ორგანიზაციები კომპანიებს მოუწოდებენ შეწყვიტონ თავიანთ პროდუქციაში პალმის ზეთის გამოყენება, რაც დააგდებს მოთხოვნას ამ ნედლეულზე და ხელს შეუწყობს ტყეების განადგურების შეწყვეტას.