დღეს, 6 ნოემბერს პარლამენტის ვიცე-სპიკერმა ზვიად ძიძიგურმა თქვა, რომ მმართველ გუნდში ყოფილი პრემიერის, ირაკლი ღარიბაშვილის დაბრუნებას "სიამოვნებით შეხვდება". ამის შესახებ ძიძიგურმა ქართული ოცნების ოფისთან ჟურნალისტის კითხვის პასუხად ისაუბრა:

"ირაკლი ღარიბაშვილთან დაკავშირებით მე შემიძლია გითხრათ, რომ ერთ-ერთი ყველაზე პოპულარული და კარგი პრემიერ-მინისტრი იყო. ღარიბაშვილი თუ შეუერთდება, ძალიან კარგი იქნება".

ქართული ოცნების დამფუძნებელმა და თავმჯდომარემ, ბიძინა ივანიშვილმა გუშინ, 5 ნოემბერს გავრცელებულ ვიდეომიმართვაში "ძველ გვარდიას", გაბრაზებულ თანამებრძოლებს მიმართა.

მმართველობის 6 წლისთავზე ივანიშვილი პირობას დებს, რომ "ყველა პატრიოტი იპოვის საკუთარ ადგილს თავისი დამსახურების მიხედვით ერთიან ოჯახში და არავის ღვაწლი არ დარჩება უყურადღებოდ".

"ახლა მთავარია, ხელისუფლებასა და ცალკეულ ჩინოვნიკებზე გაბრაზებულებმა, ხელისუფლების დასჯის სურვილით, საკუთარი მომავალი და საკუთარი ქვეყანა არ დავსაჯოთ და არ გადავყაროთ წყალში ყველაფერი, რაშიც 2012-ში სიცოცხლე ჩავდეთ", — აღნიშნა ივანიშვილმა ვიდეომიმართვაში.