გაერთიანებული ოპოზიციის საპრეზიდენტო კანდიდატი, გრიგოლ ვაშაძე მსუბუქი ნარკოტიკების მოხმარებისთვისა და შეძენა-შენახვისთვის მსჯავრდებულებს ამნისტიას პირდება. ქუთაისში ამომრჩეველთან შეხვედრისას ვაშაძემ განაცხადა, რომ მან რესპუბლიკური პარტიის ინიციატივა გაიზიარა.

"რეპრესიული ნარკოპოლიტიკის გამო უამრავი ახალგაზრდა, მათ შორის, ხელოვანები, ნიჭიერი ადამიანები, დღემდე იხდიან სასჯელს მსუბუქი ნარკოტიკების მოხმარებისთვის", — განაცხადა ვაშაძე ქუთაისში ამომრჩეველთან შეხვედრისას.

გარდა ამისა, ვაშაძემ აღნიშნა, რომ კონსტიტუციაში შეიტანს შესწორებას, რომ საქართველო არ გახდეს "ნარკოპლანტაცია", ხოლო ხელისუფლება — "ნარკობარიგა".

კანაფის კულტივაციის შესახებ კანონპროექტი და მარიხუანის მოხმარების ლეგალიზაცია გრიგოლ ვაშაძეს არაერთხელ გაუკრიტიკებია. ერთ-ერთ თავის გამოსვლაში მარიხუანაზე საუბრისას მან თქვა:

"თურმე ადამიანს უფლება აქვს ისე დაისვენოს, როგორც უნდა და შეკითხვა მაქვს კონსტიტუციურ სასამართლოსთან, პედოფილსაც აქვს უფლება ისე დაისვენოს, როგორც უნდა?!"

რამდენიმე დღის წინ ვაშაძემ განაცხადა, რომ, თუ არჩევნების მეორე ტურში ქართული ოცნების მიერ მხარდაჭერილი კანდიდატი სალომე ზურაბიშვილი გაიმარჯვებს, ბიძინა ივანიშვილი კანაფის კულტივაციის შესახებ კანონპროექტს პარლამენტში დააბრუნებს.

მმართველი გუნდის შეხვედრის შემდეგ 3 ნოემბერს საქართველოს პატრიარქთან გრიგოლ ვაშაძეც მივიდა. საპატრიარქოში მის ვიზიტს წინ უსწრებდა ქართული ოცნების ლიდერების საპატრიარქოში სტუმრობა. 2 ნოემბერს საქართველოს საპატრიარქოში შეხვედრის შემდეგ მთავრობამ გადაწყვეტილება შეცვალა და კანაფის კონტროლის შესახებ კანონპროექტს პარლამენტიდან გაიწვევს.