გაერთიანებული ოპოზიციის საპრეზიდენტო კანდიდატმა, გრიგოლ ვაშაძემ განაცხადა, რომ გაპრეზიდენტების შემთხვევაში კონსტიტუციაში შეიტანს შესწორებას, რომ საქართველო არ გახდეს "ნარკოპლანტაცია", ხოლო ხელისუფლება — "ნარკობარიგა".

მისივე თქმით, რესპუბლიკური პარტიის ინიციატივით, გამარჯვების პირველსავე დღეს, გამოაცხადებენ ამნისტიას მათთვის ვინც, შეძენა-შენახვისთვისა და მსუბუქი ნარკოტიკების მოხმარებისთვის იხდის სასჯელს.

"რეპრესიული ნარკოპოლიტიკის გამო უამრავი ახალგაზრდა, მათ შორის, ხელოვანები, ნიჭიერი ადამიანები, დღემდე იხდიან სასჯელს მსუბუქი ნარკოტიკების მოხმარებისთვის", — განაცხადა ვაშაძე ქუთაისში ამომრჩეველთან შეხვედრისას.

კანაფის კულტივაციის შესახებ კანონპროექტი და მარიხუანის მოხმარების ლეგალიზაცია გრიგოლ ვაშაძეს არაერთხელ გაუკრიტიკებია. ერთ-ერთ თავის გამოსვლაში მარიხუანაზე საუბრისას მან თქვა:

"თურმე ადამიანს უფლება აქვს ისე დაისვენოს, როგორც უნდა და შეკითხვა მაქვს კონსტიტუციურ სასამართლოსთან, პედოფილსაც აქვს უფლება ისე დაისვენოს, როგორც უნდა?!"

რამდენიმე დღის წინ ვაშაძემ განაცხადა, რომ, თუ არჩევნების მეორე ტურში ქართული ოცნების მიერ მხარდაჭერილი კანდიდატი სალომე ზურაბიშვილი გაიმარჯვებს, ბიძინა ივანიშვილი კანაფის კულტივაციის შესახებ კანონპროექტს პარლამენტში დააბრუნებს.

მმართველი გუნდის შეხვედრის შემდეგ 3 ნოემბერს საქართველოს პატრიარქთან გრიგოლ ვაშაძეც მივიდა.

ვაშაძის საპატრიარქოში ვიზიტს წინ უსწრებდა ქართული ოცნების ლიდერების საპატრიარქოში სტუმრობა. 2 ნოემბერს საქართველოს საპატრიარქოში შეხვედრის შემდეგ მთავრობამ გადაწყვეტილება შეცვალა და კანაფის კონტროლის შესახებ კანონპროექტს პარლამენტიდან გაიწვევს.