პოლონეთში ქალის მკვლელობასა და გაუპატიურებაში ბრალდებული მამუკა ხეცურიანი კიევში, უკრაინაში დააკავეს. როგორც პოლონური მედია RMF 24 წერს, დაკავებაში მონაწილეობა მიიღეს, როგორც პოლონურმა, ასევე, ქართულმა კრიმინალურმა სამსახურებმა.

39 წლის მამუკა ხეცურიანი ინტერპოლით ძებნილი იყო 28 ოქტომბრიდან.

საქმე ეხება პოლინა დინკოვსას მკვლელობის ფაქტს, რომელიც დაახლოებით ორი კვირის წინ მოხდა. იგი 19 ოქტომბერს მეგობრებთან შესახვედრად გავიდა სახლიდან. 20 ოქტომბერს, დილის 8 საათზე უსაფრთხოების კამერამ დააფიქსირა, თუ როგორ გადაადგილდებოდა უცნობ კაცთან ერთად.

ბრალდების თანახმად, 28 წლის ქალი 20 ოქტომბერს, დილის საათებში, პოლონეთის ქალაქ ლოძში, ერთ-ერთ ბინაში მოკლეს. გამოძიებამ დაადგინა ისიც, რომ საღამოს 6 საათამდე მკვლელმა ცხედარი პოლიეთილენის პარკში გაახვია და ტყეში დატოვა. გვამი ხუთი დღის შემდეგ აღმოაჩინეს.

ექსპერტიზის შედეგების მიხედვით, პოლინა დინკოვსა ყელის არეში, დანით მიყენებული ჭრილობების შედეგად გარდაიცვალა. მათივე ცნობით, ცხედარს აღენიშნებოდა ფიზიკური ძალადობის კვალიც.