აშშ-ში, ფლორიდის შტატში დააკავეს 56 წლის კაცი, რომელიც პრეზიდენტ დონალდ ტრამპის კრიტიკოსებისთვის ფოსტით, სავარაუდოდ, ასაფეთქებელი მოწყობილობების გაგზავნაშია ეჭვმიტანილი. ამერიკელი სამართალდამცავების ცნობით, მას ცეზარ სეიოქი ჰქვია და შესაძლოა, იგივე საქმეზე, ახლო მომავალში კიდევ ბევრი სხვა პირიც დააკავონ მის გარდა. BBC-ის ცნობით, სეიოქი ავტონაწილების მაღაზიაში აიყვანა პოლიციამ.

BBC იუწყება, რომ სეიოქს კრიმინალური წარსული აქვს. იგი 2002 წელსაც ბომბის ამოქმედების მუქარისთვის დააკავეს. მას მაშინ ერთწლიანი პრობაცია მიუსაჯეს.

ბოლო დღეებში 12 პაკეტი გაგზავნეს სხვადასხვა, მათ შორის, CNN-ის ნიუ-იორკის ოფისში, ყოფილი პრეზიდენტის ბარაქ ობამასა და მსახიობ რობერტ დე ნიროს მისამართებზე. ინციდენტები სწორედ მაშინ მოხდა, როდესაც ორ კვირაზე ნაკლებია დარჩენილი აშშ-ს შუალედურ არჩევნებამდე.

ორი დღის წინ, 24 ოქტომბერს აშშ-ს ყოფილი პრეზიდენტის, ბარაქ ობამასა და 2016 წელს დემოკრატების საპრეზიდენტო კანდიდატის, ჰილარი კლინტონის მისამართებზე გასაგზავნად გამზადებული ორი საეჭვო შეკვრა აღმოაჩინეს. სპეციალური სამსახურის ცნობით, ამანათში ასაფეთქებელი მოწყობილობა იყო მოთავსებული.

რამდენიმე დღის წინ, მილიარდელ ჯორჯ სოროსის სახლთანაც ასაფეთქებელი მოწყობილობა იპოვეს. Fox News-ის ცნობით, საეჭვო ნივთი საფოსტო ყუთში იპოვეს.

პრეზიდენტმა დონალდ ტრამპმა მომხდარს "ტერორისტული აქტი" უწოდა და თქვა, რომ ესაა "საზიზღარი რამ, რასაც ადგილი არ უნდა ჰქონდეს აშშ-ში".