წინასაარჩევნო პერიოდში სოციალური მედიის მონიტორინგის ანგარიშში ნათქვამია, რომ ანონიმურად მოქმედი Facebook გვერდები კონკრეტული კანდიდატებისა და პოლიტიკურად აქტიური პირების დისკრედიტაციის მიზნით მოქმედებენ. მონიტორინგის შუალედური ანგარიში სამართლიანი არჩევნებისა და დემოკრატიის საერთაშორისო საზოგადოებამ (ISFED) დღეს, 26 ოქტომბერს წარმოადგინა.

ISFED-ის კვლევით დადგინდა, რომ ამგვარ გვერდებზე გაზიარებული პოსტების დიდი ნაწილი დასპონსორებულია, რაც საარჩევნო კამპანიაში უკანონო კონტრიბუციას წარმოადგენს.

სამართლიანმა არჩევნებმა სალომე ზურაბიშვილის წინააღმდეგ მოქმედი 26 მადისკრედიტირებელი გვერდი აღმოაჩინა. მათი დიდი ნაწილი შექმნილია 2012 წლის საპარლამენტო არჩევნების შემდგომ პერიოდში და მათი მთავარი სამიზნე ამ დრომდე ძირითადად ბიძინა ივანიშვილი, ქართული ოცნება და ხელისუფლების მიერ წარმოებული პოლიტიკა იყო.

კვლევის თანახმად, გრიგოლ ვაშაძის და ერთიანი ნაციონალური მოძრაობის დისკრედიტაციის მიზნით მოქმედებს 27 გვერდი, რომელთა ორი მესამედი შექმნილია უშუალოდ 2018 წლის საპრეზიდენტო არჩევნების წინა პერიოდში.

ISFED-ის ცნობით, რამდენიმე გვერდი, შეიქმნა უფრო ადრე და მათი შექმნის თარიღი უკავშირდება 2016 წლის საპარლამენტო და 2017 წლის ადგილობრივი თვითმმართველობის არჩევნების წინასაარჩევნო პერიოდს. როგორც გრიგოლ ვაშაძის, ასევე სალომე ზურაბიშვილის წინააღმდეგ მოქმედი გვერდები ორივე კანდიდატს რუსეთის ინტერესების გატარებაში სდებს ბრალს.

დავით ბაქრაძისა და პარტია ევროპული საქართველოს წინააღმდეგ 7 გვერდი მოქმედებს. კვლევის მიხედვით, გვერდების ერთი ნაწილი მას მოიხსენიებს, როგორც ბიძინა ივანიშვილის მიერ მართულ ძალას, ხოლო მეორე ნაწილი ცდილობს კანდიდატი წარმოადგინოს, როგორც ერთიანი ნაციონალური მოძრაობის ნაწილი.

ზურაბ ჯაფარიძის და დავით უსუფაშვილის დისკრედიტაციის მიზნით მოქმედი გვერდების პოსტები შეიცავენ ანტი ლიბერალურ, ქსენოფობიურ და სიძულვილის ენის შემცველ ფრაზეოლოგიას, რაც ამ კანდიდატების პოლიტიკური იდეოლოგიების წინააღმდეგაა მიმართული.