ე.წ ქურდული სამყაროს წევრობის ბრალდებით თბილისსა და მარნეულში ხუთი პირი დააკავეს. ამის შესახებ ინფორმაცია შინაგან საქმეთა სამინისტრო ავრცელებს.

უწყების ცნობით, მათი დაკავების მიზეზი "ქურდული სამყაროს" წევრობის გარდა, "ქურდულ გარჩევაში" მონაწილეობა და "კანონიერი ქურდისადმი" მიმართვაა. შსს-ში ამბობენ, რომ დაკავებულებს კავშირი ჰქონდათ უცხოეთში მყოფ ე.წ კანონიერ ქურდებთან, ჯეირან კინწურაშვილთან და ირაკლია დანელიასთან. უწყების განმარტებითვე დაკავებულები სწორედ მათთან შეთანხმებით აწყობდნენ "ქურდულ გარჩევებს".

შსს-ში აცხადებენ, რომ საქმეზე გამოძიება საქართველოს სისხლის სამართლის კოდექსის 223 პრიმა მუხლის პირველი ნაწილით, 223 პრიმა მუხლის მე-2 ნაწილით და 223 პრიმა მუხლის პირველი ნაწილებით მიმდინარეობს. ეს დანაშაული 7-დან 10 წლამდე ვადით თავისუფლების აღკვეთას ითვალისწინებს.