ჩინეთი და რუსეთი აშშ-ის პრეზიდენტის, დონალდ ტრამპის აიფონზე სატელეფონო ზარებს უსმენენ, წერს New York Times ამერიკის სპეცსამსახურების ყოფილ თანამშრომლებზე დაყრდნობით. როგორც გამოცემა განმარტავს, ზარების მოსმენის შესახებ ყოფილმა თანამშრომლებმა სხვა ქვეყნის მთავრობებში წყაროებისგან გაიგეს.

როგორც წყაროებმა გამოცემას უთხრეს, ჩინეთი სწავლობს როგორ მსჯელობს ტრამპი, როგორი არგუმენტებით შეიძლება მისი დარწმუნება და ვის უჯერებს. მათივე თქმით, ამ ინფორმაციის გამოყენება ჩინეთს ტრამპზე ზეგავლენის მოსახდენად სურს. გარდა ამისა, მათ ტრამპის მეგობრების სია შეადგინეს, რომლებსაც პრეზიდენტი ყველაზე ხშირად ესაუბრება და ჩინეთთან ბიზნესკავშირები აქვთ. გამოცემა აღნიშნავს, რომ რუსეთი, ჩინეთისგან განსხვავებით, დიდად არ ცდილობს, რომ რამე სერიოზული მოიმოქმედოს.

New York Times წყაროებზე დაყრდნობით წერს, რომ პრეზიდენტის ადმინისტრაცია და ამერიკული სპეცსამსახურები ტრამპს აიფონით საუბარზე უარი ვერ ათქმევინეს. ისინი იმედოვნებენ, რომ საუბრების დროს, პრეზიდენტი სახელმწიფო საიდუმლოებებს არ განიხილავს.

გამოცემა აღნიშნავს, რომ ტრამპს სამი აიფონი აქვს, რომელთაგან ორი ოფიციალურია. ერთი მათგანი ტვიტერისთვისა და სხვა აპლიკაციებისთვის გამოიყენება, ხოლო მეორე ზარებისთვის. New York Times არ აკონკრეტებს რომელ ტელეფონს უსმენენ ჩინეთი და რუსეთი.