"გაგრძელდება მსჯელობა, მათ შორის საპატრიარქოსთან. თუ დავრწმუნდებით, რომ ხიფათის შემცველია, საზოგადოების წინააღმდეგ არ წავალთ", — ასე გამოეხმაურა ქართული ოცნების თავმჯდომარე, ბიძინა ივანიშვილი კანაფის კულტივაციის კანონპროექტის შეჩერებას.

ივანიშვილის თქმით, კანაფის ექსპორტი ქვეყნისთვის მომგებიანია, მაგრამ საზოგადოებას "ადეკვატური რეაქცია" ჰქონდა. ივანიშვილი სწორედ ამით ხსნის კანონპროექტის გადავადებას.

როგორც ქართული ოცნების ლიდერმა აღნიშნა, კანაფის წარმოებას იმიტომ დათანხმდა, რომ ექსპორტიდან 2 მილიარდის მოგება მომხიბლავად ჯღერს.

ეკლესია კანაფის წარმოებისა და ხელისუფლების წინააღმდეგ

კანაფის წარმოების შესახებ ეკლესიის აზრის გათვალისწინების შესახებ ქართული ოცნების არაერთმა წევრმა ისაუბრა. მათ შორის, ირაკლი კობახიძემ, ეკა ბესელიამ, სოფიო კილაძემ და პარტიის მიერ მხარდაჭერილმა კანდიდატმა, სალომე ზურაბიშვილმაც.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა და კანონპროექტის წინააღმდეგ ბრძოლაში აქტიურად ჩაერთო. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

საპროტესტო პარაკლისებისა და პატრიარქის ქადაგების შემდეგ, ხელისუფლებამ კანონპროექტის განხილვაში საპატრიარქოც ჩართო. პარლამენტის თავმჯდომარემ, ირაკლი კობახიძემ კი განაცხადა, რომ საპატრიარქოს არაფრის დათმობა არ მოუწევს.

პარლამენტმა კი კანაფის კონტროლის კანონპროექტის განხილვა გადაავადა. პარლამენტში კანონპროექტის უკან გაწვევაზეც მსჯელობდნენ.