უმრავლესობის წარმომადგენლებმა განაცხადეს, რომ მარიხუანის კულტივაციის კანონპროექტის განხილვისას მართლმადიდებელი ეკლესიის საპატრიარქოს აზრს გაითვალისწინებენ. მათივე თქმით, კანონპროექტის განხილვა არჩევნების შემდეგ დაიწყება.

საქართველოს პარლამენტის ადამიანის უფლებათა კომიტეტის თავმჯდომარე, სოფო კილაძე ამბობს, რომ საარჩევნო კამპანია დიდ დროსა და რესურსს მოითხოვს და მარიხუანის კულტივაციის თემას ამ პერიოდის შემდეგ ამიტომ დაუბრუნდებიან. მისივე თქმით, ნაადრევია იმაზე საუბარი, თუ რა გადაწყვეტილებას მიიღებს მთავრობა საპატრიარქოსთან ერთად.

"ერთი ვიცი, რომ ჩვენ ისეთ გადაწყვეტილებას არ მივიღებთ, რომელიც იქნება საზოგადოების დიდი ნაწილის წინააღმდეგ მიმართული და, რა თქმა უნდა, ყველანაირად შევეცდებით, რომ ჩვენი დედა ეკლესიის, რომელიც დიდი ავტორიტეტის მქონეა და რომელსაც აქვს ძალიან დიდი დატვირთვა ჩვენი საზოგადოებისთვის, აზრიც იყოს გათვალისწინებული", — განაცხადა კილაძემ ჟურნალისტებთან საუბრისას.

ეკლესიასთან სადისკუსიო ფორმატზე საუბრობს საპარლამენტო უმრავლესობის წევრი, დიმიტრი ცქიტიშვილი და ამბობს, რომ სურვილის შემთხვევაში კონსულტაციაში ჩართვა ყველას შეეძლება.

"შეხვედრები შეიძლება იყოს დისკუსიიის ფორმატში ან ყველა დამოუკიდებლად აკეთებდეს ტელევიზიით განცხადებებს", — აღნიშნა ცქიტიშვილმა.

ცქიტიშვილი სადისკუსიო პერიოდში დაპირისპირებას არ ელოდება და ამბობს, რომ "ყელაფერი ისე მოხდება, როგორც დემოკრატიულ საზოგადოებაში".

პარტია ქართული ოცნების დეპუტატის, გედევან ფოფხაძის პოზიციით კი პოლიტიკურად სწორი იქნება, თუ მთავრობა ამ თემას გაიწვევს და საკითხი ამოიწურება. ფოფხაძე ამბობს, რომ დეპუტატთა პოზიციები იცის და "გაუკვირდება პარლამენტი სხვანაირად თუ მოიქცევა".

"ამ გუნდში საკმარისად გონიერი ადამიანები ვართ შეკრებილი, რომ მსგავს საკთხებს არ გადავაყოლოთ ის მიზანი, რისთვისაც გავერთიანდით", — განაცხადა დეპუტატმა.

მარიხუანის კულტივაციის კანონპროექტის განხილვა

საქართველოს პარლამენტმა კანაფის კონტროლის შესახებ კანონპროექტის განხილვა ორი თვით გადაავადა. შესაბამისი მოთხოვნით საქართველოს პარლამენტის ბიუროს ჯანდაცვისა და სოციალური დაცვისა და იურიდიულ საკითხთა კომიტეტებმა მიმართეს.

შინაგან საქმეთა მინისტრი, გიორგი გახარია მარიხუანის კულტივაციის კანონპროექტის განხილვის გადავადების მიზეზად კონსულტაციებს ასახელებს. მინისტრის თქმით, მუშაობა იქამდე გაგრძელდება, სანამ მხარეების პოზიციები არ დაახლოვდება. გახარიამ განაცხადა, რომ 2-3 თვეს არ აქვს მნიშვნელობა და იმსჯელებენ იქამდე, სანამ კონსესუსს არ მიაღწევენ. მისივე განმარტებით, საზოგადოების არცერთ ნაწილთან დაპირისპირებას არ აპირებენ.

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე, აიკრძალება არასამედიცინო მიზნით კანაფის კულტივაციაც.

დოკუმენტი 131-გვერდიანია და დამტკიცების შემდეგ, სულ მცირე, 10 კანონში გამოიწვევს ცვლილებას. კანონპროექტს როგორც ეკლესიიდან, ისე საზოგადოებისგან კრიტიკა მოჰყვა. საქართველოს საპატრიარქომ განცხადება გაავრცელა, სადაც აღნიშნა, რომ ნებისმიერი მიზნისთვის მარიხუანის რეალიზაციის ლეგალიზებას ეწინააღმდეგებიან. კანონპროექტის გადავადების გადაწყვეტილება პარლამენტის თავმჯდომარემ მას შემდეგ მიიღო, რაც ინიციატივას ეკლესია დაუპირისპირდა.