გონიოში, ზღვაში დაკარგული ერთ-ერთი სამხედროს, იაგო შარაძის ოჯახის წევრები იმ შემთხვევაში, თუ შარაძეს უახლოეს დღეებში არ იპოვიან, გზების გადაკეტვით იმუქრებიან.

შარაძის ოჯახის წევრები განმარტავენ, რომ უბედური შემთხვევა ინსტრუქტორების დაუდევრობით მოხდა და შტორმის დროს 30 მეტრის სიმაღლზე სამხედროები თოკის გარეშე არ უნდა ჩაეშვათ.

გარდა ამისა, თავდაცვის სამინისტროს ინფორმაციით, სამძებრო-სამაშველო ღონისძიებების განსახორციელებლად თურქეთიდან, დღეს დილის 2 საათზე კიდევ ერთი ხომალდი დაიძრა. თურქეთის საზღვაო ძალების მცურავი საშუალება, რომელიც შესაბამისი პერსონალითაა დაკომპლექტებული და სამძებრო აპარატურითაა აღჭურვილი, საქართველოს ტერიტორიულ წყლებში ხვალ დილით შემოვა.

აჭარის მთავრობის ხელმძღვანელმა, ზურაბ პატარიძემ კი განაცხადა:

"ძალიან მნიშვნელოვანია, რომ რაც შეიძლება სწრაფად ვიპოვოთ ბიჭები. ამ გემს აქვს სპეციალური აღჭურვილობა. ძალიან ფორსირებულად და სწრაფად მოხდება ლოკაციის დადგენა".

საქართველოს ტერიტორიულ წყლებში თურქეთის სანაპირო დაცვის პირველი კატარღა 9-კაციანი ეკიპაჟით გუშინვე შემოვიდა და სამუშაოებში ჩაერთო.

ზღვაში ორი სამხედრო მოსამსახურის, იაგო შარაძისა და გიორგი ნანიტაშვილის პოვნა კვლავ ვერ ხერხდება. მათ ამ დრომდე მყვინთავთა რამდენიმე ჯგუფი ეძებს. გონიოში საზღვაო ზოლში იმყოფებიან სამხედრო პოლიციისა და გენერალური ინსპექციის წარმომადგენლები. საქმეში ჩართულია ავიაციაც.

საქართველოს თავდაცვის სამინისტროს განცხადებით, საწვრთნელი ვარჯიშის დროს, ზღვაში სიღრმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.