შინაგან საქმეთა სამინისტროს ცნობით, სოფელ ლამბალოში მოტაცებული არასრულწლოვანი გოგო პოლიციამ თავშესაფარში გადაიყვანა, ოჯახის მიმართ კი, არასრულწლოვანი გოგოს უსაფრთხოების მიზნით, შემაკავებელი ორდერი გამოსცა. უწყების მტკიცებით, ამჟამად გოგოს ჯანმრთელობას საფრთხე არ ემუქრება.

შსს-ს ცნობით, გასაუბრებისას არასრულწლოვანმა განმარტა, რომ რამდენიმე თვის წინ გაიცნო თავისი თანასოფლელი - ს.ი. და მასთან ოჯახის შექმნა გადაწყვიტა.

უწყება აცხადებს, რომ გოგოს განმარტებით, რაიმე სახის ძალადობას ან/და მისი თავისუფლების უკანონო აღკვეთას ადგილი არ ჰქონია და ყველა მოქმედება განხორციელდა მისი ნამდვილი ნების შესაბამისად:

"ანალოგიური ინფორმაცია მიაწოდა გამოძიებას ს.ი.-მ და მისმა თანმხლებმა პირმა".

შინაგან საქმეთა სამინისტრო აცხადებს, რომ არასრულწლოვანმა გამოკითხვისას ოჯახის მხრიდან, მისი ამ გადაწყვეტილების გამო, შესაძლო ფსიქოლოგიურ და ფიზიკურ ძალადობაზე ისაუბრა.

შინაგან საქმეთა სამინისტროს ცნობით, 17 წლის არასრულწლოვნის ადგილსამყოფელის დადგენის შემდეგ, მასთან მუშაობა დაიწყო სოციალურმა მუშაკმა და წამების მსხვერპლთა ფსიქოსოციალური და სამედიცინო რეაბილიტაციის ცენტრის GCRT-ის ფსიქოლოგმა. არასრულწლოვანს, ასევე, გაესაუბრა სახალხო დამცველის აპარატის წარმომადგენელი, რომელიც გამოძიების ადგილზე იმყოფებოდა.

მოზარდს კახეთში 5 დღის განმავლობაში ეძებდნენ. მისი მოტაცების შესახებ ინფორმაცია 12 ოქტომბერს შევიდა კახეთის პოლიციის დეპარტამენტში.

გამოძიება საქართველოს სსკ-ის 143-ე მუხლის მე-3 ნაწილის დ ქვეპუნქტით მიმდინარეობდა, რაც არასრულწლოვნის თავისუფლების უკანონო აღკვეთას გულისხმობს.