ჯანდაცვის მინისტრი დავით სერგეენკო ამბობს, რომ მედიით გავრცელებული სავარაუდოდ მირზა სუბელიანის ჩანაწერები "წარმოუდგენელია, რომ რეალური" იყოს.

"რამდენადაც მე ვიცი ამ ჩანაწერების ირგვლივ აღძრულია გამოძიება და მე მგონი, რომ ყველა კითხვას პასუხი გაეცემა. ჩემი პირადი პოზიცია არის, რომ იქ გაჟღერებული ამბები რეალობასთან, ჩემი აზრით, არ უნდა იყოს ახლოს", — განაცხადა მინისტრმა.

ტელეკომპანია რუსთავი 2-მა 14 ოქტომბერს ხორავას ქუჩის საქმეზე დანაშაულის შეუტყობინებლობისთვის დაკავებული, მირზა სუბელიანის სავარაუდო აუდიოჩანაწერები გაავრცელა. აუდიოჩანაწერში საუბარია გახმაურებული საქმეების გახსნის ძალადობრივ მეთოდებზე, ხელისუფლების კომპრომატებზე, ხორავას ქუჩის საქმეზე და სავარაუდოდ, ყოფილი პრემიერის, ვანო მერაბიშვილის ციხიდან გაყვანის ეპიზოდზე.

აუდიოჩანაწერში, რომლის ავთენტურობა ჯერ დადგენილი არ არის, სავარაუდოდ, სუბელიანი ქართული ოცნების დეპუტატ ვიქტორ ჯაფარიძესთან და ლტოლვილთა სამინისტროს ყოფილ მაღალჩინოსანთან, გენერალური ინსპექციის ყოფილ თანამშრომელთან, დათო ცუხიშვილთან საუბარია ასახული.

დეპუტატი ვიქტორ ჯაფარიძე ადასტურებს, რომ დაკავებულ მირზა სუბელიანს საპატიმროში შეხვდა. On.ge-ს კითხვაზე — ადასტურებს თუ არა რუსთავი 2-ის გავრცელებული ჩანაწერების ავთენტურობას დეპუტატი პასუხობს:

"ავთენტურობას ექსპრეტიზა დაადასტურებს, მე ვერა. კი, კი ვიყავი ოფიციალურად შესული. პარლამენტის წევრი ვარ, ნებართვა მქონდა და შევედი. იყო ეს საუბარი, მაგრამ ეს მე ჩავთვალე, რომ იყო არასერიოზული საუბარი და რეაგირება არ გამიკეთებია", — აცხადებს დეპუტატი.

საქართველოს მთავარი პროკურატურის ინფორმაციით, პენიტენციური სამსახურის თანამშრომელს "მირზა სუბელიანის ჩანაწერების" გავრცელების მიზნით აშანტაჟებდნენ. უწყებაში ამბობენ, რომ ამ ეტაპზე გამოძიება მიმდინარეობს სისხლის სამართლის საქმეზე პირადი ცხოვრების საიდუმლოს უკანონოდ მოპოვებისა და შენახვის, იძულების, პატიმრობაში მყოფი პირის კერძო საუბრის უნებართვო ჩაწერის, ჩანაწერის უკანონოდ შენახვისა და ხელმისაწვდომობის უზრუნველყოფის და სამსახურებრივი უფლებამოსილების შესაძლო გადამეტების საქმეებზე.