საქართველოს მთავარი პროკურატურის ინფორმაციით, პენიტენციური სამსახურის თანამშრომელს "მირზა სუბელიანის ჩანაწერების" გავრცელების მიზნით აშანტაჟებდნენ. ბრიფინგი ამ საკითხზე რამდენიმე წუთის წინ გაიმართა.

უწყებაში ამბობენ, რომ პენიტენციური სამსახურის თანამშრომელს პირადი ცხოვრების ამსახველი კადრების გასაჯაროების მუქარით მოსთხოვეს სუბელიანის შეხვედრების ფარული ჩანაწერების გავრცელება. უწყების განცხადებით, აღნიშნულმა პირმა მათ გადასცა მეხსიერების ბარათი, რომელიც შეიცავს რამდენიმე ფარულ ჩანაწერს, მათ შორის იმ ფაილსაც, რომელიც გუშინ, 14 ოქტომბერს რუსთავი 2-მა გაავრცელა. მათი თქმით, ჩანაწერების ავთენტურობის დასადგენად ჩატარდება ექსპერტიზა.

უწყების განცხადებით, ამოღებული აუდიოჩანაწერების პირველად ანალიზზე დაყრდნობით, გამოძიება განიხილავს პირთა ჯგუფის მიერ კონკრეტული შინაარსის საუბრების ორგანიზების ვერსიას, მათი შემდგომი გავრცელების მიზნით.

უწყებაში ამბობენ, რომ ამ ეტაპზე გამოძიება მიმდინარეობს სისხლის სამართლის საქმეზე პირადი ცხოვრების საიდუმლოს უკანონოდ მოპოვებისა და შენახვის, იძულების, პატიმრობაში მყოფი პირის კერძო საუბრის უნებართვო ჩაწერის, ჩანაწერის უკანონოდ შენახვისა და ხელმისაწვდომობის უზრუნველყოფის და სამსახურებრივი უფლებამოსილების შესაძლო გადამეტების საქმეებზე.

პროკურატურის განცხადებით, გამოძიების ინტერესებიდან გამომდინარე ამ ეტაპზე არ ასაჯაროებენ გამოძიების პროცესში მოპოვებულ ყველა აუდიოჩანაწერს. თუმცა, მათივე თქმით, მაღალი საზოგადოებრივი ინტერესიდან გამომდინარე, პროკურატურა საზოგადოებას დროდადრო მიაწვდის ინფორმაციას.

"მირზა სუბელიანის ჩანაწერები"

გუშინ, 14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

პროკურატურაში ამბობენ, რომ გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია.

ამავე თემაზე: