პრეზიდენტობის კანდიდატის, კახა კუკავასა და მისი პარტიის წევრის, გოგი წულაიას მიერ სოციალურად დაუცველი ოჯახისთვის ქუთაისში, საღორიას ტყეში მათივე მოჭრილი შეშის დარიგება, შესაძლოა, ამომრჩევლის მოსყიდვა იყოს. ამის შესახებ On.ge-ს სამართლიანი არჩევნებისა და დემოკრატიის საერთაშორისო საზოგადოების იურისტმა, თათია ქინქლაძემ განუცხადა.

იურისტი მოუწოდებს აუდიტის სამსახურს შეისწავლოს აღნიშნული ინფორმაცია და მოსყიდვის დამტკიცების შემთხვევაში საარჩევნო სუბიექტი დააჯარიმოს. თათია ქინქლაძის თქმით, თუ დადგინდა, რომ საჩუქრის ღირებულება 100 ლარს აღემატება, შესაძლოა სისხლის სამართლის დანაშაულის ნიშნებიც გამოიკვეთოს.

აუდიტის სამსახურში On.ge-ს უთხრეს, რომ გავრცელებულ ინფორმაციას იკვლევენ და დამატებით ინფორმაციას მოგვიანებით მოგვაწვდიან.

სამართლიანი არჩევნების იურისტის განცხადებით, ორგანიზაცია შეისწავლის ამ კონკრეტულ ფაქტს და მიიღებს გადაწყვეტილებას, რა ფორმით იმოქმედოს: მიმართოს სასამართლოს თუ აუდიტის სამსახურს.

პრეზიდენტობის კანდიდატის, კახა კუკავას თქმით, ერთი კუპური მეტრი ხე აქციის ფარგლებში მოჭრა და მხოლოდ ერთ ადამიანს გადასცა. მას მიაჩნია, რომ ამომრჩეველი არ მოუსყიდია და ხის მოჭრას სხვა დატვირთვა ჰქონდა.

"აქციის ამოცანა იყო დაგვენახვებინა მოსახლეობისთვის, რომ არასწორ პოლიტიკას ახორციელებს ხელისუფლება ტყეში ხის ჭრასთან დაკავშირებით და ამის განხილვა ამომრჩევლის მოსყიდვად არის კანონის არცოდნა", — უთხრა On.ge-ს კახა კუკავამ.

ამომრჩევლის მოსყიდვის საკითხს საარჩევნო პერიოდში საარჩევნო კანონმდებლობა და მოქალაქეთა პოლიტიკური გაერთიანების შესახებ კანონი არეგულირებს.

საარჩევნო კანონმდებლობის 47-ე მუხლის მეორე პუნქტში წერია, რომ თუ საარჩევნო სუბიექტი, მისი წარმომადგენელი ან მის სასარგებლოდ მოქმედი რომელიმე ფიზიკური და იურიდიული პირი მოისყიდის ამომრჩეველს, პრეზიდენტობის კანდიდატს რეგისტრაცია უუქმდება. ამ გადაწყვეტილებას სასამართლო სხვა საარჩევნო სუბიექტის ან სადამკვირვებლო ორგანიზაციის სარჩელის საფუძველზე იღებს.

მოქალაქეთა პოლიტიკური გაერთიანების შესახებ კანონი განმარტავს მოსყიდვის ცნებას. კანონის ჩანაწერში ვკითხულობთ, რომ პარტიას, ასევე კანდიდატს, წარმომადგენლის მეშვეობით ნებისმიერი ფორმით მოქალაქეებისთვის ფულის, მატერიალური ან არამატერიალური საჩუქრის გადაცემა ეკრძალება. მსგავსი ფაქტების შესწავლის პასუხისმგებლობა კი აუდიტის სამსახურს აკისრია.