საქართველოს ფინანსთა სამინისტროს საგამოძიებო სამსახურმა დიდი ოდენობით სახელმწიფო ქონების თაღლითურად დაუფლების ბრალდებით ერთ-ერთი კომპანიის ორი ხელმძღვანელი და დმანისის მუნიციპალიტეტის ყოფილი თანამშრომელი სისხლის სამართლის პასუხისგებაში მისცეს.

უწყების ინფორმაციით, აღნიშნულმა კომპანიამ გაიმარჯვა დმანისის მუნიციპალიტეტის მიერ ორგანიზებულ ტენდერში, რომლის მოთხოვნების თანახმად, კომპანიას ოთხი ობიექტის სარემონტო - სარეაბილიტაციო სამუშაოები უნდა განეხორციელებინა. სამუშაოების საერთო ღირებულება 546 882 ლარი იყო.

საგამოძიებო სამსახურის მიერ გავრცელებულ განცხადებაში ვკითხულობთ, რომ უკანონო მატერიალური გამორჩენის მიღების მიზნით, ხელშეკრულებით ნაკისრი ვალდებულებები უგულებელყვეს და სამუშაოები უხარისხოდ შეასრულეს. ასევე, სამუშაოების შესრულებასთან დაკავშირებულ დოკუმენტაციაში ხელოვნურად გაზარდეს შესრულებული სამუშაოების მოცულობები.

"აღნიშნული ქმედებით, დანაშაულში მხილებული პირები მართლსაწინააღმდეგოდ დაეუფლნენ, საერთო ჯამში, 143 451 ლარს", - ნათქვამია ამავე განცხადებაში.

უწყების ცნობით, დმანისის მუნიციპალიტეტის გამგეობის წარმომადგენელმა, რომელსაც სამუშაოების მიმდინარეობაზე ზედამხედველობა ევალებოდა, არ განახორციელა შესაბამისი კონტროლი შესრულებულ სამუშაოებზე, რითაც ხელი შეუწყო ბრალდებულების მიერ სახელმწიფოს კუთვნილი თანხის მოტყუებით დაუფლებას.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მესამე ნაწილით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.