ადამიანის უფლებათა ცენტრისა და ჩართულობისა და განვითარების ცენტრის განცხადებით, 25 წლის უფლებადამცველის, ვიტალი საფაროვის მკვლობაში ბრალდებულები ე.წ. ნეონაცისტური დაჯგუფების წევრები არიან. ამის შესახებ მათ მიერ გავრცელებულ განცხადებაშია ნათქვამი.

ადამიანის უფლებათა ცენტრსა და ჩართულობისა და განვითარების ცენტრს მიაჩნიათ, რომ შესაძლოა, 25 წლის უფლებადამცველის, ვიტალი საფაროვის მკვლელობის საფუძველი ქსენოფობიური მოტივი იყო. მათივე თქმით, საქმეზე გამოძიება არასწორი კვალიფიკაციით მიმდინარეობს და დანაშაულის მოტივი არაა მითითებული.

არასამთავრობოები მოუწოდებენ პროკურატურას, საქმე გადააკვალიფიციროს და გამოძიება დამამძიმებელ გარემოებებში განზრახ მკვლელობის მუხლით დაიწყოს. ამასთან, განიხილოს დანაშაულის ჩადენის შესაძლო რასობრივი, რელიგიური, ეროვნული ან ეთნიკური შეუწყნარებლობის მოტივი.

პროკურატურის პრესსამსახურში On.ge-ს განუცხადეს, რომ საფაროვის მკვლელობის საქმეზე გამოძიება განზრახ მკვლელობისა და დანაშაულის შეუტყობილებლობის, სსკ-ს 108-ე და 376-ე მუხლებით მიმდინარეობს და დამატებითი მტკიცებულებების მოპოვების შემთხვევაში მუხლი გადაკვალიფიცირდება.

ამავე არასამთავრობოების ცნობით, მოწმეებმა ორი წლის განმავლობაში დაკავებულების მიერ ჩადენილ მსგავს შემთხვევებზე პოლიციას არაერთხელ მიმართეს, თუმცა რეაგირება არ ყოფილა.

2018 წლის 30 სექტემბერს უფლებადამცველი, ვიტალი საფაროვი მოკლეს. იგი "ჩართულობისა და განვითარების ცენტრში" მუშაობდა. შინაგან საქმეთა სამინისტრომ იმავე დღეს საქმეზე ორი პირი დააკავა.