კვირას, 10 აპრილს მალტის დედაქალაქ ვალეტაში ათასობით ადამიანი შეიკრიბა ქვეყნის პრემიერ-მინისტრის ჯოზეფ მუსკატის გადადგომის მოთხოვნით.

საპროტესტო ტალღა მას შემდეგ აგორდა, რაც პანამის დოკუმენტებში პრემიერთან დაახლოებული პირების სახელზე რეგისტრირებული ოფშორული კომპანიები აღმოაჩინეს.

"შენ ხარ სამარცხვინო ადამიანი და არ გაქვს არც პოლიტიკური და არც მორალური უფლება, რომ მართო ეს ქვეყანა." - განაცხადა ოპოზიციის ლიდერმა სიმონ ბუსუტიმ მიტინგზე.

დოკუმენტების მიხედვით, მალტის ჯანდაცვისა და ენერგეტიკის მინისტრი კონრად მიზი პანამაში დაფუძნებულ კომპანიას და ახალ ზელანდიაში რეგისტრირებულ ფონდს ფლობს. პანამაში იმავე სახის კომპანია და ფონდი აქვს დაფუძნებული პრეზიდენტის ადმინისტრაციის ხელმძღვანელ კიტ შემბერს.

პრემიერ-მინისტრს მისი გადადგომის მოთხოვნაზე კომენტარი არ გაუკეთებია. მუსკატი მისი მთავრობის წევრების ოფშორული კომპანიების თემას გამოეხმაურა და განაცხადა, რომ გადაწვეტილებას ამ ორი ადამიანის შესახებ მას შემდეგ მიიღებს, რაც ყველა ფაქტი გახდება ხელმისაწვდომი და სიტუაციაში უკეთ გაერკვევა.

მსოფლიოს 400-მდე ჟურნალისტისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად.