"ეს არის ხელმოცარული და უნიათო ფაშისტის განცხადება", — პარლამენტის თავმჯდომარემ ირაკლი კობახიძემ დღეს, 8 ოქტომბერს გამართული საგანგებო ბრიფინგი რუსთავი 2-ის გენერალური დირექტორის ნიკა გვარამიას ფეისბუქსტატუსს დაუთმო.

ირაკლი კობახიძემ ნიკა გვარამიას 5 ოქტომბრის განცხადებას, რომელიც პრეზიდენტობის კანდიდატის, სალომე ზურაბიშვილის დამფინანსებლებს ეხებოდა, "ისტერიული" უწოდა:

"განცხადება უსათუოდ უკავშირდება კანდიდატების რეიტინგებს, რომელთა მიხედვითაც, სალომე ზურაბიშვილი დამაჯერებლად იგებს არჩევნებს, ხოლო ნიკა გვარამიას და ნაციონალური მოძრაობის პარტიული კანდიდატი, გრიგოლ ვაშაძე, შესაძლოა, მეორე ადგილზეც ვერ გავიდეს".

ქართული ოცნების ლიდერმა არასამთავრობო ორგანიზაციებიც გააკრიტიკა იმის გამო, რომ ნიკა გვარამიას "ფაშისტური განცხადება" არ შეაფასეს:

"მეტიც, ერთ-ერთმა მათგანმა, მიხეილ ბენიძემ ნიკა გვარამიას დაცვაც კი იკადრა (ანუ უკადრებელი იკადრა), რაც უკიდურესად შემაშფოთებელია".

კობახიძის თქმით, ზოგიერთი პოლიტიზირებული პერსონის გამო, ზიანდება არასამთავრობო სექტორის როლი:

"გვინდა ხაზგასმით განვაცხადოთ - ვინც ხელს აფარებს ფაშიზმს, თავადაც არის ფაშიზმის თანამონაწილე. სამწუხაროა, რომ ასეთი ადამიანები არასამთავრობო ორგანიზაციების ხელმძღვანელებს შორისაც არიან. ქართული ფაშიზმი ჩვენ ჩავაბარეთ წარსულს 2012 წელს და ჩვენ ვართ პასუხისმგებელი იმაზე, რომ საქართველოში ის მომავალში ვეღარ გაიდგამს ფესვებს".

5 ოქტომბერს ნიკა გვარამიამ ფეისბუქის საკუთარ გვერდზე გამოაქვეყნა განცხადება, სადაც ის წერს, რომ ყველა, ვინც სალომე ზურაბიშვილს ან აფინანსებს, ან კამპანიაში სხვაგვარად ეხმარება, უნდა შევიწროვდეს.

"ყველა ეს ადამიანი უნდა დავიმახსოვროთ და გვახსოვდეს, რომ მოღალატის გვერდში დამდგომი ხალხია, და მათგან ყველაფერს უნდა ელოდოს ჩვენი სამშობლო. უნდა დავიმახსოვროთ, და გავაძევოთ საზოგადოებრივი ცხოვრების ყველა სფეროდან, იქნება ეს ბიზნესი, კულტურა თუ პოლიტიკა. ქვეყნის მოღალატე და მისი მოკავშირეები საჩვენებლად უნდა დაისაჯონ! მე, პირადად, ვაპირებ ამას მივუძღვნა საკუთარი თავი უახლოვესი რამდენიმე წელი. ჯერ არჩევნების წაგებაში ძალიან დავეხმარები მოღალატე სალომეს (აუცილებლად წააგებს) და მერე მივუბრუნდები მის დამხმარეებს", — წერს ნიკა გვარამია.