სახელმწიფო უსაფრთხოების სამსახური ხურვალეთიდან გატაცებული მაია ოთინაშვილის ჯანმრთელობის მდგომარეობაზე საუბრისას ცხელი ხაზით მიერ მოწოდებულ ინფორმაციას ეყრდნობა და აცხადებს, რომ ოკუპირებული ცხინვალის წარმომადგენლის ცნობით, უკანონოდ დაკავებული მაია ოთინაშვილის ჯანმრთელობის მდგომარეობა დამაკმაყოფილებელია.

სამხრეთ ოსეთის დე ფაქტო რესპუბლიკაში სახელისუფლებო მედიამ გატაცებული მაია ოთინაშვილის ფოტო გაავრცელა. მათი მტკიცებით, ოთინაშვილი კარგადაა. როგორც გამოცემა წერს, ჟურნალისტებმა ის პირადად მოინახულეს.

გამოცემა ირწმუნება, რომ მაია ოთინაშვილს, დაკავების შემდეგ, ადვოკატი და თარჯიმანი დაუნიშნეს. მათივე თქმით, ის თავს კარგად გრძნობს, თუმცა ოჯახი ირწმუნება, რომ ოთინაშვილი ნაცემია. ომბუდსმენისა და ოჯახის ინფორმაციით, ქალი ქარძმანში განლაგებულ რუსულ ბაზაზე სცემეს.

მაია ოთინაშვილი 29 სექტემბერს რუსმა სამხედროებმა გაიტაცეს. მას "ბრალად ედება" თანხის სანაცვლოდ მოქალაქეების ე.წ. საზღვრის უკანონო გადაკვეთაში დახმარება. ოთინაშვილს ორთვიანი წინასწარი პატიმრობა შეეფარდა. წითელი ჯვრის წარმომადგენლებმა დაკავებული უკვე მოინახულეს, თუმცა ოთინაშვილის ჯანმრთელობის შესახებ ინფორმაციას არ ავრცელებენ.